Tun season-a an chet chhiat em avangin Manchester United head coach Michael Carrick-a dinhmun a derthawng hle a, kum 45 mi hian ban a hmachhawn mek niin a lang. United hian Carrick hi ban ta se, a thlaktu atan sum tam tak seng lova club nei lo (free agent) manager eng zat nge chhawr theih tur awm ang?
Season liam ta khan United chu Premier League-ah pathumna nihpui mah se, kumin nipui bazarah khan Carrick hian transfer atan £153million chauh a dawng a, chu pawh midfield thuam nan hman ral a ni. Tun season-ah erawh United an che chhe hle a, Champions League-ah Como laka 4-1 ngawta an tlawm hnuah, Pathianni khan Old Trafford-ah Bournemouth laka 3-0 ngawtin an tlawm nawn leh a, league table hnuai lamah an tlathla mek a ni.
Carrick hi ban a nih chuan lailawk atan Darren Fletcher chu dah leh theih a nih laiin, an thlaktu tur manager ṭha zalen lai an tam hle a ni. Chung zinga Manchester Evening News-in an thlan chhuah mi pasarihte chu hengte hi an ni:
1. Eddie Howe: Newcastle enkawltu hlui hi Carrick-a thlaktu tur zingah a langsar berte zinga mi a ni. Kum nga dawn St James' Park-a hun a hman hnuah July thla khan a chhuahsan a, tunah hian a chawl mek. Howe hian Magpies chu Champions League a khelhpui bakah, kum 2025 khan Carabao Cup a chawipui a, Bournemouth pawh Championship title a lakpui tawh a ni.
2. Antonio Conte: Chelsea leh Spurs boss hlui Conte pawh hian United enkawl theih dan chungchang a lo sawi lang tawh a ni. Napoli chu 2024-25 Serie A title a lakpui hnuah June thla khan a chhuahsan a, Serie A title vawi nga lai lo la tawh a ni. Chelsea-ah pawh Premier League leh FA Cup a lo chawi tawh bawk. Tun hnaiah thuchhuah siamin club thar enkawl a inhuam thu a sawi na a, United nena inbiakna an la neih loh thu erawh a sawi tel thung.
3. Julian Nagelsmann: Germany national team chu 2026 World Cup hnua chhuahsantu Nagelsmann hi tunah hian club nei lovin a la awm mek a. Hoffenheim, RB Leipzig leh Bayern Munich te lo enkawl tawh niin, English club lian te pawhin an lo ngaihven tawh ṭhin a ni.
4. Kieran McKenna: United coach hlui hian Old Trafford kalhmang a hrechiang hle a, Under-18 bakah Jose Mourinho leh Ole Gunnar Solskjaer-a te hnuaiah first-team coach a lo ni tawh a ni. Ipswich Town chu Premier League-ah a kaisanpui a, June thla khan a chhuahsan a. Amah hi United ṭantu ruhkawl a nih rualin, lakluh a nih chuan a zangnadawmna (compensation) pek a ngai dawn thung a ni.
5. Gareth Southgate: July 2024-a England manager hna a chawlhsan aṭang khan Southgate-a hming hi United nen sawizawm a ni tawh ṭhin a. Three Lions chu World Cup semi-final leh Euros final vawi hnih a thlenpui tawh a, hun ṭha a awm chuan club football-a kir leh a inhuam thu a lo sawi tawh bawk.
6. Roberto Martinez: Swansea, Wigan leh Everton manager hlui Martinez hian Belgium chu 2018 World Cup-ah pathumna a nihpui a, Portugal chu Nations League nomawi a chawipui bawk. Bruno Fernandes leh Diogo Dalot te nena an inlaichinna ṭha tak avangin ngaihven zinga mi a ni bawk.
7. Ole Gunnar Solskjaer: Club legend Solskjaer hian kum 2018 leh 2021 inkar khan United hi a lo enkawl tawh a. August 2025 khan Turkish club Besiktas-in an ban hnuah club nei lovin a la awm mek a ni.
