Aston Villa nen 4-4 a an inhnehtawk zawhah, Manchester United head coach Michael Carrick chuan an defender Harry Maguire-a hliam chungchang thuthar lawmawm lo tak a puangzar.
Kar liam taa AS Roma laka comeback neia hnehna an chan ṭum khan Maguire-a fitness chungchangah hian rinhlelhna a lo awm tawh a. Mahse Villa laka inkhel tur hian bul ṭan thei tura ngaih niin, Old Trafford-ah Leny Yoro nen central defence-ah an inkawp zui a ni.
Inkhelh ṭan tirh minute li chhung lekin Aston Villa-in goal hnih an khung nghal a, Maguire leh United tlarhnung vengtute an phili hle. Mahse United hi inbengdai lehin half-time hmain an siphurh an rul a, Bruno Fernandes-a penalty hmanga goal khung leh Youri Tielemans-a goal thun hmangin score 2-2 an siam a. Half-time-ah Maguire hi lakchhuah a ni a, a hmunruak luah turin Ayden Heaven a rawn lut thung.
Second half inṭan hnuah mualneitu United tlarhnung a che chhe leh hle a, John McGinn leh Leon Goretzka te chuan Villa tan goal an khung belh leh a ni. Michael Carrick leh a player-te chu Premier League match zawh takah khan tlawmna vaivut bual hmachhawn nawn leh mai dawn nia a lan laiin, stoppage time-ah substitute Joshua Zirkzee leh Patrick Dorgu te chuan goal thun lehin match 4-4 in an ti-tew ta a ni. He result avang hian chawlhkar hnih chhung international break a thlen chhungin United hi relegation zone-ah an awm zui dawn a ni.
Match zawha media te nen an inbiaknaah Carrick chuan half-time-a Maguire a thlak chhan a sawifiah a. MUTV hnenah Carrick chuan, "Harry-a hnungzang a na hle a ni. First half zawh hma minute 10 aṭanga 15 vel a la awmin a hnungzang thahrah na tak (spasm) a nei a. Eng tiang chiahin nge a ṭhat loh ka hre lo va, mahse international break a thleng zui dawn avangin inenkawl damna hun ṭha tak a nei turah ka ngai," tiin a sawi.
Maguire hi tun season chhungin inelna hrang hrangah Manchester United tan match 13 a inlan tawh a. International break zawh, November 22-a Liverpool an luhchhuah hunah erawh Lisandro Martinez chu a rawn dam chhuak tawh dawn avangin Carrick-a squad-ah a rawn inlan thei tawh bawk ang.
