Thlasik transfer window inhawng tur inbuatsaihna kal zelah, Manchester United Women chuan an squad hmakhua tianghet turin hma an la ṭan ta.
Red Devils hi inelna hrang hrangah match 10 chhung zawnin tlawm lo rek an thlen mek a, an club boruak pawh a ṭha hle a ni. United official website thuchhuah aṭanga hriat danin, club chuan an player 5-te contract-a kum khat pawhsei theihna option awm chu an hmang a. Heng player 5 - Mared Griffiths, Dominique Janssen, Lucy Newell, Anna Sandberg leh Julia Zigiotti te hi kum 2027/28 season tawp thleng Manchester United-ah hian an cham dawn ta a ni.
Heng player contract pawhsei takte hi an che ṭha hle hlawm a. Rawlthar Mared Griffiths hi tun season-ah an phochhuah thiam berte zinga mi niin, Players' Cup-ah goal 6 ngawt a khung tawh a, Sheffield United 10-1 a an sawp ṭum khan hat-trick a lo nei hial tawh a ni. Rawlthar dang Lucy Newell pawhin hun ṭha a hmu chhunzawm zel dawn a, head coach Eva Olid-i'n an academy chhuak rawlthar engemaw zat hmun ṭha pek a duh avangin he contract hi pawhsei a ni.
Nipui liam taa an lakluh Swedish player Julia Zigiotti pawh club-a player pawimawh berte zinga mi a ni chho mek a. Tun season chhungin goal thum a khung tawh a, Arsenal leh Liverpool nena an match pawimawh inhmachhawnnaah goal a lo khung tawh a ni. Sandberg pawhin United a zawm aṭangin a theihna a phochhuak ṭha hle a, first team-ah a inlan zing hle. Defence laili-ah captain Maya Le Tissier-i tarna turin Netherlands captain, tawnhriat nei ṭha Dominique Janssen chuan United-ah hian kum khat dang tal a chhunzawm leh dawn bawk a ni.
Press conference-ah coach Eva Olid-i chuan heng contract pawhsei a nih chungchang hi sawiin, "Anni hi ka thawhpui chhunzawm zel chak, kan ṭhanlen dun leh hmasawn dun zel tur player-te an ni. Player ṭha an nih bakah mihring ze ṭha tak nei an ni a. Keini tan chuan mihring ṭha leh player ṭha te hi team boruak chhungah hian vawn reng a pawimawh em em a ni, a chhan chu boruak duhawm leh puitling tak siam kan duh vang a ni. Hmun puitling, mitawh mai hlim taka lo kal a, hmasawn tuma in-challenge tawnna, boruak ṭha tak siam hi kan duh ber a ni," tiin a sawi.
Manchester United Women hian tun kar tawp hian Villa Park-ah mualneitu Aston Villa an hmachhawn ang a, he match hi 12:00 GMT-ah ṭan a ni ang.
