Chawlhkar thum chhung ram tana chawlh (international break) a neih hnuah, kar tawp hian Manchester United chuan Premier League an khel leh dawn ta a. Michael Carrick-a naute hian Tottenham an hmachhawn hunah hnehna chan ngei tumin bul an ṭan thar a beiseiawm hle a ni. Mahse he match pawimawh takah hian Spurs hmachhawn tur hian Carrick chuan an player pawimawh eng emaw zat a chhawr thei dawn lo va, chutih rualin hliam vanga chawl ṭhenkhat erawh an lo kir ṭep tawh thung.

United tan season bul ṭan dan a beidawnthlak hle a, league match nga an khelh tawhah point nga chiah an la hmu a ni. Thla liam ta khan Carabao Cup aṭangin an lo tla tawh bawk nen, manager Michael Carrick-a lakah pressure a sang ṭan hle. October thla chhung hian match khelh tur a inlar zut dawn avangin, ram tana an khelh laia hliam nei nual tawh United hian hliam thar neih belh loh hram an beisei a ni.

Manchester United player hliamte dinhmun chu hetiang hi a ni:

Benjamin Sesko:

Brighton nena Carabao Cup an khelh ṭum khan a inlan thei tawh lo va, Slovenia squad aṭang pawhin a inhnukdawk zui a ni. Carrick chuan, "Ben-a chu a buaina neih mekah hian a la dam fel mai lo va, chuvangin a la inpeih dawn lo a ni," tiin a sawi. Sesko hi October tawp lam emaw November tir lamah emaw a lo kir theih beisei a ni.

Kobbie Mainoo:

Ram tana khel tura a awm laiin a inhnukdawk a, mahse tun kar chhung khan training a zawm leh tawh thung. Carrick chuan, "Carlos [Baleba] a ziaawm tawh hle a, training pawh a nei nasa. Amad, Marcus leh Kobbie-te pawhin training tlem an nei tawh bawk," a ti. Mainoo hi Inrinni hian Spurs lakah a inlan theih a beiseiawm a ni.

Patrick Dorgu:

Denmark leh Wales inhmachhawn ṭum khan darkar chanve chauh khelmualah a awm hman a, international squad a chhuahsan zui a ni. Carrick chuan, "Patrick-a kha lakchhuah a ni a, chawlhkar eng maw zah chu a chawlh a ngaih hmel," tiin a sawi a. November tawp emaw December tir lamah emaw chauh a lo kir theih a rinawm.

Matthijs de Ligt:

A hnungzang hliam vangin hun rei tak a chawl tawh a, mahse a lo kir ṭep tawh niin a lang. Carrick chuan, "Matta chu a rawn inbuatsaih ve mek zel a. Hliam a neih dan ngaihtuah hian engtikah nge a lo kir chiah ang tih hunbi bituk ka duh lo a ni," tiin a sawi a, November thla vela lo kir theih tura beisei a ni.

Marcus Rashford:

Fulham an hmachhawn ṭum khan hliam tenau a neih avangin lakchhuah a ni a, England camp aṭangin a inhnukdawk bawk. Mahse tun kar chhung khan training a nei tawh a, Inrinni hian Tottenham lakah a inlan theih a beiseiawm a ni.

Amad Diallo:

Hull City nena season hawng match an khelh hmain hliam a nei a, tun season Premier League-ah a la inlan miah lo. Mahse training tlem a neih ve tawh avangin Spurs lakah hian a lo kir ve theih an beisei bawk.

Noussair Mazraoui:

Morocco-in Lesotho an hneh ṭum khan lakchhuah a ni a, a hliam len zawng hi a la hriat chian theih rih loh a ni. Carrick chuan, "Nous kha lakchhuah a ni a, na a tuar deuh a ni. A la ṭha famkim lo va, a dinhmun kan la thlithlai zel phawt a ngai ang," a ti.

Manuel Ugarte:

He midfielder hi kumin nipui World Cup-ah Uruguay tana a khelhna lamah a khup ligament na takin a hliam a, a la chawl chhunzawm rih a ni.