Manchester United goalkeeper Senne Lammens chuan club legend Paul Scholes leh Roy Keane te sawiselna chu chhangletin, Old Trafford-a mipuite ngaihven hlawh ber nih chu engtin nge a hmachhawn ṭhin tih a sawichhuak ta.
Kum 24 mi Belgian goalkeeper hian kum khat liam ta vel khan Royal Antwerp aṭangin £18.2million-in United hi a zawm a, tunah chuan club-a goalkeeper rinrawl ber (No. 1) a ni chho mek a ni. Mahse tun season chhung hian club player hlun leh hmingthangte lakah sawisel a tawk ṭan thung.
Thla liam taa Manchester City laka 1-0 a an tlawm hnu khan, Premier League nomawi chawi turin United hian Lammens aia goalkeeper ṭha chungchuang an mamawh em tih Scholes chuan a zawt chhuak a. Keane pawhin Manchester derby-a an tlawm hnu lawka Old Trafford khelmuala a chhungte nena Lammens-a a awm kual vel chu a lo sawisel bawk a ni.
Scholes chuan City laka an tlawm hnu khan, "Goalkeeper ṭha chungchuang nei lova Premier League la thei team i hmu tawh ngai em ni? Lammens hi chutiang chu a ni maithei a, ka hre bik lo, ngaihdan a la insem darh rih a nih ka ring. Goalkeeper ṭha chungchuang i mamawh ngei ngei a ni. Liverpool-a Alisson te, City goalkeeper te, Arsenal-a Raya te hi han ngaihtuah teh. Manchester United-a Peter Schmeichel leh Edwin van der Sar te pawh kha. Anni zawng zawng khan goalkeeper ṭha chungchuang hlir an nei a ni. Tlarhnung aṭanga bul ṭan a ngai reng a ni," tiin a lo sawi tawh a nih kha.
Tun kar chhung hian Lammens hi ram tan Belgium tan a khel ṭha hle a, Scholes leh Keane-a te ang mi larte sawiselna a dawn chungchang an zawhna chu chhangin: "United tana khelh hian ka mizia a thlak danglam chuang lo. Mi dangte'n an ngaihdan an sawichhuah luai luai lai hian rilru lamah i paukhauh a ngai a, mahni inrintawkna i neih a ngai a ni. Hei hi mi zawng zawng tan thil awlsam a ni lo maithei tih chu ka hrethiam e. Premier League match khelh hi nuam ka ti em em a. Premier League emaw, Nations League pawh nise, ka tan chuan danglamna a awm chuang lo," tiin a sawi.
Nations League khelh chhung hian Thibaut Courtois chu Belgium squad aṭangin a inhnukdawk rih a, Lammens hian he hunṭha hi chhawr ṭangkaiin coach Mark van Bommel-a hnuaiah an goalkeeper rinrawl ber nihna hauh tumin hma a la mek bawk a ni.
Courtois chungchang sawiin Lammens chuan, "He mi chungchang hi kan sawi tam lo hle. Tun laia match awm mekte leh tuna awm sa player-te chunga rilru sawrbing hi a pawimawh berin ka hria. Tun dinhmunah chuan keimah hi number one ka nih ka inring a. Ka khelh ṭhat a, engtik lai pawha ka inpeih reng a ngai a ni. Hmabak thil thleng tur chu ka thunun theih a ni lo; mahse ka khelh dan leh theihna erawh ka thunun thei a ni," tiin a sawi bawk.
