Manchester United striker hlui Michael Owen chuan Old Trafford-a a kir leh hnua a chet ṭhat theih meuh loh avangin, Marcus Rashford chu United tlarhma zinga "a chak lo lai ber" (weak-link) a nih thu a sawi chhuak.

Kum 28 mi England international hian Aston Villa leh Barcelona-a loan-a hun a hman hnuah United a zawm leh a, United-in Premier League match an khelh hnuhnung panga zinga paliah bul a ṭan tawh a, Pathiannia Fulham nen 1-1 a an inhnehtawk ṭum pawh khan a inlan a ni. Rashford hian tun season chhungin khelmualah theihna a neih ṭhat zia thil langsar tlem a pholang ve bawk mah se, inelna hrang hrangah minute 400 chuang a khelh tawh hnuah goal emaw, midang pet luh tur (assist) emaw vawi khat mah a la nei miah lo a ni.

Fulham an hmachhawn ṭum hian a kawng hliam avangin second-half-ah lakchhuah a ni a, a aiah Joshua Zirkzee a rawn lut a nih kha. He hliam avang hian international break laia England squad aṭangin a inhnukdawk a, October ni 10-a Tottenham nena an inkhelh leh hma chawlhkar thum chhung chu inenkawl dam nan a hmang dawn a ni.

Rashford-a dinhmun leh a chet dan chungchang sawiin, Premier League Productions-ah Owen chuan he forward-in goal a thun theih loh leh khelmuala a thawhchhuah a tlem lutuk chu a ngaihven hle tih a sawi.

Owen chuan, "Tlarhma veilamah chuan Marcus Rashford hi che tlem ber leh reh ber a ni mai thei a ni. Vawiin pawh khan a chet dan leh a taksa chetzia (body language)-ah a reh leh hle a, a hmelah pawh lungngaihna leh beidawn hmel a lang reng mai.

"Football hi a ngaina tawh lo emaw tih tur a ni a, hei hian Marcus-a lakah beidawnna a thlen fo ṭhin a ni. Khawvel phurrit zawng zawng a darah nghat ni awm tak a ni a, engatinge? engvang nge? tiin i ngaihtuah lo thei lo. Mi zawng zawng duhthusam nun a hmang mek a nih hi. Tun dinhmuna football a ngainat loh hmel em emna chhan hi phen lam thil thleng eng emaw a awm ngei a rinawm," tiin a sawi.

Season liam ta khan Rashford hian Barcelona-ah season ṭha tak hmangin inelna hrang hrangah match 49 a khelhah goal 14 a khung a, assist vawi 11 lai a nei hman a ni. Mahse Camp Nou-a a inrintawkna a neih let kha a tla hniam leh tan mek niin a lang a, head coach Michael Carrick-a'n fak a, hun remchang a pe leh chung pawhin a la nung thei lo a ni.

Owen chuan sawi chhunzawmin: "A hun ṭha tawp ber chu Barcelona kha a ni. Barcelona ang club lian a zawm thei kha a vannei ka ti hial a ni. Khatih lai khan a che ṭha thawkhat a, mahse che ṭha tawk an tih loh avangin an chelh zui ta lova, a thlaktu atan Anthony Gordon lakluh nan sum tam tak an thehchhuak ta zawk a nih kha. Chuvangin, mi dangin sawi mawi tum viau mah se, engkim kha a famkim vek bik lo a ni.

"Tichuan Manchester United-ah a rawn kir leh a. A khel chhe lo a, mahse chhe lo satliah chauh a ni. Tlarhma pathum zingah hian a aia ṭhain a khelh a ngai a ni, a chhan chu an tlarhmaah hian a position hi an sawp theih awlsam ber lai tur a ni tlat.

"Benjamin Sesko chu hliamin a tibuai lo a nih chuan rawn luh a, bul a rawn ṭan beiseina a lian hle a. Chutiang chu a nih tak tak phei chuan Matheus Cunha chu veilamah a insawn phei ang a, tun dinhmunah chuan Rashford hi chu tlarhmaah chuan an chaklohna lai ber tur (weak link) a ni tlat a ni," tiin a sawi zui bawk a ni.