Champions League inkhela Atletico Madrid laka Manchester United an tlawm hnuah, Argentina defender Lisandro Martinez chuan insum miah lovin club thuneitute a kawk ta siah mai a, squad thuamchak tura sum an hman danah a lungawi loh thu tlang takin a phawrh chhuak ta a ni.

He tlawmna rapthlak tak an tawrh hnu hian, khelmuala squad theihna tihpun tura hmalakna chungchangah 'beisei a neih san thu' a lo sawi tawh kha squad-a sum invest chungchang a kawk em tih zawh a nihin, Martinez chuan chiang takin a nemnghet nghal.

Martinez chuan, "Aw, zaa za (100 per cent) a kawk e. Kan technical director lakah hian beiseina sang zawk ka lo nei a ni. Thudik tak sawi tlang ta ila, player te pawh hian a aia ṭha hian kan khelh a ngai ngei mai, mahse hetiang zan lian leh khirh tak tak hmachhawn tur hian squad chak ṭha tak din a pawimawh em em bawk a ni," tiin tlang takin a sawi chhuak a ni.

Thla hnih liam ta chhung vel khan season tharah Martinez hian United a chhuahsan mai dawn em tih thu a lo thang tawh a, tuna a ṭawngkam hman dan aṭang hian a chhanna tur chu a langchiang viau tawh maithei a ni.

Pundit-te leh United ṭantute chuan nipui lai aṭang tawh khan squad thuam nan club-in sum a thehchhuak tawk lo tiin an lo phunpui nasa tawh hle a. Mahse head coach Michael Carrick chuan transfer policy chungchang an zawh apiangin hawihhawm leh diplomacy thiam takin thil a sawi ṭhin thung. Martinez erawh chuan zep ṭit-ṭet nei lovin technical director Jason Wilcox chu a bei ta nghek mai a ni.

Inkhelh zawh hlim te a nih avangin boruak a lum viau chu a nih rualin, Martinez hian a thinlung chhung tak aṭanga sawi chhuak a nih zia leh club-in squad an thuam ṭhat danin a ti-lungawi lo hle tih a lang chiang hle.

Club chhung aṭanga hruaitu lian te kawk ngam khawpa mahni ngaihdan sawi ngam player an awm ta hi United fan-te pawhin ngaihdan hrang hrang an nei mek a. Mi tam takin thudik a phawrhchhuak ngam chu an thlawp hle laiin, ṭhenkhat erawh chuan Martinez-a'n mipui hmaa club hierarchy a sawisel ta mai chu a dik lo tiin an ngai thung a ni.