Champions League-ah Manchester United leh Atletico Madrid te an inhmachhawn dawn hnaih mekin, club pahnih tana lo khel tawh Dutch forward Memphis Depay chuan Old Trafford-a hun a hman lai chu a nun tana hun hrehawm tak a nih thu a sawichhuak. Kum 2015 khan beiseina sang tak nei chunga United zawm ni mah se, Depay hian Premier League-ah a theihna sang a phochhuak thei ta lo a ni.
Kum 2014 World Cup-a Netherlands tana a chet ṭhat bakah, PSV Eindhoven tana season khata inelna hrang hranga goal 28 ngawt a khung hnuah Louis van Gaal chuan United-ah hian a lalut a. Mahse ram tana che ṭha ṭhin Depay hian England-ah erawh harsatna a tawk chho nghal a, Europe inelnaah match 11 khelhin goal 5 thun mah se, league lamah erawh match tam tak a inlan chhungin goal hnih chiah a khung thei a ni.
Kum 2019-a a lehkhabu ziah 'Heart of a Lion'-ah Depay chuan a hun harsa paltlang dan hi tarlangin, Van Gaal-a hnuaiah tlarhnung venhim lam hna a thawh tam a ngaih avangin a talbuai ṭan a, Jose Mourinho a rawn luh phei chuan dinhmun a chhe zual hle. Portuguese manager hnuaiah hian minute 134 chauh khelmualah hun a hmu a, hei hian a rilru hriselna a khawih pawi hle a ni.
Depay chuan, "Kha mi hun chhung khan ka inthununna ka hloh a ni ber mai. Training zawhin inah ka haw a, tumah hmuh ka duh ngai lo. Rilru lamah hun hrehawm tak a ni a, nitin mai khan a zualkai deuh deuh a ni," tiin a sawi. "Pawn lam aṭanga thlir chuan nun nuam tak nei ka ang: khawvela club lian berte zinga mi tana khel, swimming pool nei in mawi tak maia ka ṭhian ṭha ber Gigi [Vitale] nena cheng, Rolls-Royce khalh ka ni. Mahse ka nunah khan ka hlim lo takzet a ni."
A sawi zawmnaah, "A vawikhatna atan football khelh nawmna ka hloh a. Ka dam chhung zawnga thil mawi ber ni ṭhin football chuan lungngaihna thuk tak min pe a ni. Ka beidawnna chu nitin a zual a, engtin nge ka thlak danglam ang tih pawh ka hre lo," a ti bawk.
January 2017 khan United chhuahsanin French club Lyon a pan a, hetah hian a theihna rawn pholang tharin khelmuala minute 100 dan zelah goal emaw assist emaw a nei thei a ni. Hemi hnu hian Barcelona-ah lutin, January 2023 khan Atletico Madrid a zawm leh a. Atletico-ah hian a match pangana lekah United tana a league goal khung zat (goal 2) chu a khum der tawh a ni.
Diego Simeone-a hnuaiah khelhna hmun chang tam tawk lo mah se, kum 2024 khan Madrid chhuahsanin Brazilian club Corinthians a pan a, United-a a khelhpui ṭhin Jesse Lingard nen an inkawp mek bawk. Hetah hian game 88-ah goal 20 khungin assist 16 a nei tawh a, Netherlands tana goal khung hnem ber ni mek bawkin goal 55 a khung tling tawh a ni.
