Manchester United legend Wayne Rooney chuan club chet chhiat chhunzawm zel avangin captain Bruno Fernandes-a lungawilohna leh thawpikna chu a sang hle tawh a, hetih zela a kal chuan a puak chhuak mai ang tih a hlauhawm thu a sawi.

Rooney hian Portuguese midfielder hian a hmaa harsatna bawk an hmachhawn leh mekah rilru pik tak hmela a awm a hmuh thu leh hei hian a khelh danah pawh nghawng a neih ṭhin thu a sawi a ni.

United hian inelna hrang hrangah game riat an khelh aṭangin vawihnih chiah hnehna an la chan a - pakhat chu Premier League-ah niin a dang chu Champions League-a Sabah an hneh ṭum kha a ni - in a zawnin match li chhung hnehna an chang tawh lo a ni. An match hnuhnung pahnihah phei chuan chak zo lovin vannei takin point an hmu hram hram a ni ber a; international break hmain Fulham laka 1-1 a an inhnehtawk ṭum khan Matheus Cunha-a shot liam tur a per luh tak avangin point an hmu a, Tottenham Hotspur 10-na laka an inkhelh pawhin stoppage-time-ah Dominic Solanke-a'n goal a rawn khung hlauh bawk a ni.

The Overlap's 'Stick to United' podcast-a a sawinaah, Rooney chuan Fernandes-a phurrit tiziaawm tur leh thawk a lak theih nan hmun pawimawh lutuk aṭanga laichhuah rih emaw rest pek rih a fuh zawk maithei tih a sawi. "A hmel aṭang hian 'e le, a ngai bawk kha kan thleng leh ta' tih a lang chiang em em a ni. Vawi engemaw zat team hi a lo chawikan tawh ṭhin a, a malkhatin fakna dawngin goal leh assist a nei hnem tawh a, team phurrit zawng zawng a zakpuak a ni. Mahse, he dinhmun aṭang hian thawklakpui a ngai tawh a ni," tiin a sawi.

Rooney chuan sawi chhunzawmin, "Amah ngeiin a intilut a, a inla chhuak thei lo a, chuvang chuan he mawhphurhna aṭang hian chawlhhahdamna hun pek a ngai a ni. Rilru pik tak leh tawt taka a awm chho hi a hmuh theih a, hetianga a chhunzawm zel a nih chuan a puak chhuak ngei dawn a ni. A rilru leh ngaihdan tlang taka sawi chhuak ngam mi a nih avangin thil a kal zel a nih chuan puahchhuahna lian tak a awm ang," a ti.

United midfield dinhmun chungchang sawi zuiin Rooney chuan, "Fernandes hi dahchhuak rih ta ila, a hnung lamah sawn hlek emaw rest pe ta la, midfield a nghet zawk ang a, match chawikan leh hnehna lak hmasak ber hi an mamawh ber a ni. Youri Tielemans pawhin he position-ah hian a khel thei a, mahse ka tan chuan midfield-ah hian mi pathum an mamawh a ni. A chhan chu tumpuite an tlan khum nasa lutuk a, Tielemans leh Kobbie Mainoo te hi an tlan chak lovin mual dung leh vang a thui zawnga tlan kual turin an zangkhai tawk lo a, ṭanpui an mamawh a ni. Carlos Baleba hi dah tel ta se, an tlarhnung mi pali te tan venhimna zawngin zangkhai zawkin an khel thei ang," tiin a tarlang.

He podcast-ah hian United defender hlui Phil Bardsley pawhin Rooney hi rawn zawmin, Fernandes-a'n Europe inelna leh England-a inelna hrang hranga nomawi inchuh thei tura team chawikan a tumna kawngah a thawpik hmel tawh hle tih a sawi ve bawk. Bardsley chuan team-a player dangte pawh mawhphurhna la ngam tura an inthlahdah loh a ngai hle tih a sawi a, "Bruno hi thawhchhuah tir rih mai ila a pawi em ni? A chau tawh takzet a ni, a thawpik hmel em em a, kum 3, 4, 5 chhung zet team a lo chawikang tawh a. A khelh a fuh loh ni a awm pawhin player dang an rawn penchhuah a ngai a, mahse chutiang ti zui thei an awm tlat lo a ni," tiin a sawi bawk.