Kum 2022 February thlaa Champions League round of 16-ah khan Manchester United chuan Metropolitano Stadium-ah Atletico Madrid chu 1-1 in an inhnehtawkpui a. Inkhelh zawhah United interim manager Ralf Rangnick chuan hlim taka nui chungin, "Kha hla kha chu mitin maiin an hre thei a ni," tiin khelmuala United tantute zai chanchin a sawi chhuak a nih kha.
He inkhelah hian Joao Felix-a'n Atletico tan hma a hruaipui hnuah, minute 75-naah Rangnick chuan Marcus Rashford thlakin rawlthar Anthony Elanga a luhtir a. Mual a rah aṭanga minute nga lekah Elanga hian mawi takin an siphurh a rawn rul a, Metropolitano Stadium-a khualmual ṭantu awmna lam chu a ri nghal hum hum mai a ni. Eurodance hla lar 'Rhythm Is A Dancer' thluk hmangin United fan-te chuan, "Rhythm is a dancer, Anthony Elanga, you won’t stop him if you dare. He came from Scandinavia, to be United’s saviour, scoring goals from everywhere," tiin an lo sa chuap chuap a ni.
Elanga hian kha mi thla tir lama penalty a hlah hnuah a theihna rawn pholang lehin danglamna a thlen a, midang goal khung vanga lawm lawk lo chi Cristiano Ronaldo meuh pawhin a lawmpui hle. Inkhelh zawhah Elanga chuan, "Hetiang hun hi ka suangtuah ṭhin a, Atletico Madrid ang Europe club ṭha laka Champions League-ah goal khung theih chu mumang a taka thleng a ni. Ball ka khawih hmasak ber a nih pawh ka ring. Rangnick-a'n tlarhnung vengtute tihlau tur leh an hnung lama tlan lut turin min hrilh a, hunṭha ka hmuh veleh ka hmang ṭangkai ta a ni. Khualmual thleng thui tak min rawn ṭawiawmtu fan-te tan result ṭha ka duh em em a ni," tiin a sawi.
Khatih lai khan he rawlthar hi January transfer window-ah khan loan-a chhuak mai tur anga ngaih a ni hman a. Rangnick chuan, "A chungchang hi ka staff-te ka zawt a, club aṭanga loan-a chhuah a lo tum fel deuhthaw tih ka hria a. Transfer window khar thleng training-ah a chet dan en tura cham turin ka ti a ni. Rilru dik leh inpekna nen football-ah engkim a theih tih a rawn pholang a, a theihna zawng zawng phawrhin khelmualah nuam a ti hle a ni," tiin a fak hle a nih kha.
Solskjaer-a'n debut a siampui tawh ni mah se, Rangnick-a hnuaiah hian Elanga hi a rawn langsar lehzual a, Rashford leh Jadon Sancho te meuh pawh a karcheh hman a ni. Mahse, he beiseina hian a daih rei ta lo. Atletico nena an inhnehtawk hnu ni thum lekah mahni mualah Watford nen 0-0 in an inhnehtawk a, Elanga chuan yard ruk hla aṭangin goal awlsam tak a thelh hlauh mai a ni. Hei hian an phurna tihnep zuiin, a dawt leh chiah Manchester derby-ah Man City lakah 4-1 ngawtin an tlawm zui ta a.
Erik ten Hag-a'n United a enkawl zui tak hnuah Elanga hian hmun a chang ta meuh lo va, Dutch manager hian Premier League level sang tak tana la tling tawk loah a ngai a ni. Tichuan, kum 2023 nipuiah khan Nottingham Forest hnenah £15million-in an hralh ta nge nge a. Forest-ah hian che ṭha viauin Newcastle United chuan £55m lai sengin an la zui bawk a, mahse Atletico muala Rangnick-a'n United star ropui thar tur nia a lo beisei ang erawh kha chu a ni chho ta lo a ni.
