Netherlands leh Chelsea legend hlui Ruud Gullit chuan Manchester United rawlthar Kobbie Mainoo chu fak vut vut leh player ṭha ber anga chhal nghal chiam ṭhin chu he English midfielder tan hian a ṭha lo zawk tih a sawichhuak.
Kum 21 mi Mainoo hian Ruben Amorim-a'n United a enkawl laia hun harsa tak a tawh hnuah, Michael Carrick-a'n Amorim-a hmunruak a luah hnu khan a theihna sang a rawn pholang leh ṭan a. Carrick-a hnuaiah hian United academy chhuak Mainoo hi an tlar lailiah player pawimawh takah a rawn inhlangkai chho leh a ni. 2025-26 season chawhnu lama a rawn chet ṭhat leh tak em avang hian England squad-ah pawh koh kir lehin, World Cup squad-ah pawh hmun a chang zui a nih kha.
Tun season tharah pawh hian Stockport-a piang rawlthar hian beiseina a la siam nung chhunzawm zel a, Premier League match li an khelh tawh zingah vawi thum bul a ṭan tawh a, Everton nena 2-2 a an inhnehtawk ṭum pawhin assist a nei nghe nghe. Inelna hrang hrang match paruk United-in an khelh tawhah Mainoo hi a la inlan kim vek a, Carrick-a tan chuan lakluh thar Youri Tielemans nena kawp turin a duhthlan hmasa ber a ni chho mek a ni. Old Trafford-a an Champions League match hmasa berah pawh bul a ṭan a, Carabao Cup-a Brighton laka an tlawm ṭum erawh khan bench aṭangin a rawn lut thung.
ComeOn hnenah thu sawiin Gullit chuan he rawlthar hi midang nena khaikhina tehkhawng hrang hrang siamsak vut vut loh a, puitling tura hun thawl pek zawk a ngaih thu a sawi.
Gullit chuan, "Kobbie Mainoo hi ball thiam (technical player) tak a ni. Mahse a la naupang hle a, hahchawlhna hun kan pek a ngai a ni. Kan la hmuh tawh zawng zawnga player ṭha ber a nih thu sawiin a lakah beiseina sang lutuk kan nghat nghal ngawt tur a ni lo," tiin a sawi.
Sawi zawmin Gullit chuan, "A puitlin theih nan hun a mamawh a, chu mi ti tur chuan a khelhna hmun hrechiang tu, amah aia upa leh tawn hriat nei ṭha zawk player-te a mamawh bawk a ni. Anni bulah hian a awm tam a ngai a, training neih lai ngei pawhin thil tih tur leh tih loh tur an zirtir a ngai a ni," a ti bawk.
Ineos lamin United midfield an thawmṭhat chhoh mek lai hian squad inthlak danglam karah Mainoo hian fiahna thar a hmachhawn mek tih Gullit hian a sawi bawk a ni.
"Manchester United hi team insiamṭha mek (team in transition) an ni a. Hetiang dinhmuna awm mek team-ah hian Kobbie Mainoo ang player tan khelh a awlsam lo hle. A kum ngaihtuahin team pum pui a darpuia zawn tura beisei ngawt chi a ni lo. Chet ṭhat chang a nei ang a, chet chhiat chang pawh a nei ang; a kum rual naupang tan chuan chu chu thil thleng pangngai reng a ni. A theihna sang vawng reng thei (consistent) tur chuan hun a la duh dawn a, chu chu thil pangngai tak a ni. Hetiang dinhmunah hian tawnhriat nei ṭhate an mamawh takzet a ni," tiin a hrilhfiah.
Thawhlehni khan manager thar Thomas Tuchel-a hnuaia October thlaa international match an khelh tur atana England squad puanah Mainoo hi a tel ve leh tawh bawk a ni.
