Manchester United head coach Michael Carrick chuan director of football Jason Wilcox a sawisel hnuah Lisandro Martínez-a ngaihdam dilna chu pawmin, an buaina chu chinfel a nih tak thu leh Pathiannia Leeds United tlawh tur squad-ah defender hi chhawr theih a nih tur thu a nemnghet ta.

United boss hian result ṭha lo avanga sawiselna an tawh nasat em em lai hian he thubuai hi an sawizawm tawh dawn lo tih a tichiang hle a ni.

Thawhlehnia Champions League-a Atlético Madrid laka 2-0 a an tlawm hnu khan, Martínez hian United director of football chu sawiselin, squad thuam chak nana sum sen belh (investment) a ngaih thu a lo phulpui a nih kha. Mahse Ningani thuchhuahah, a rilru natna leh a thinrimna chu a hun leh a hmun lo taka a phawrh chhuah palh avangin ngaihdam a dil leh ta a ni.

A ngaihdam dilnaah hian Wilcox-a hming a lam lang lova, squad thuam chak a ṭul zia a sawi erawh a la sut chuang lo thung. The Guardian-in an tarlan danin Carrick chuan Martínez-a'n a tihsual a pawm chu a tawk a, club pawhin an theihnghilh tawh tih pre-match press conference-ah a sawi a ni.

Carrick chuan Elland Road-a Leeds an tlawhna turah Martínez chu a khelh theih tur thu a nemnghet zui bawk. He thil thleng avang hian hremna a tawk dawn em tih zawhna awm mah se, Carrick-a chhanna aṭang hian team chhungah buaina a awm zui a beisei lo tih a chiang hle.

United hian Premier League match ruk an khelh tawhah point ruk chiah an la hmu a, thla hmasa khan Carabao Cup aṭangin Brighton-in an lo hnawtchhuak tawh bawk a, Champions League-ah vawi khat chakin vawi khat an tlawm tawh bawk a ni. Hetiang dinhmun khirh karah hian Carrick hian buaina dang nei thei a ni lo hrim hrim.

Luke Shaw leh Kobbie Mainoo te pawh fitness test an neih a ngai dawn a, Carrick hian an dinhmun a la puangzar lo. Martínez-a thusawi khan Madrid-a an tlawm hnuah squad thuk zawng leh player indaih lohna chu mi mit hmuhah a rawn pho lang chiang lehzual a ni.

Carrick chuan Martínez-a rilru puthmang chu a hriatthiampui thu sawiin, player-te laka a duh em em phurna leh inpekna chu team tana ṭha zawnga hman ṭangkai a pawimawh thu a sawi a. Atlético laka minute hmasaber a goal an chhuah hnua United player-te chet dan chu an inrintawkna leh an inpumkhat zia tarlangtu a nih thu a kawk bawk.

Wayne Rooney chuan Martínez-a ṭawngkam hman khan dressing room boruak a tichhe thei tih a lo vawrh chhuak tawh a. Carrick erawh chuan pawn lam sawiselnate hian squad chhungril boruak a hril lo tih sawiin, Zirtawpnia an dinhmun chu a hma aia ṭha zawk daih a nih thu a sawi a ni.

United fiahna lehpek chu Pathianniah Elland Road-ah Leeds United hmachhawn a ni dawn a, Shaw leh Mainoo te fitness enfiah a nih dan chu match ṭan hmaa team chanchin ngaihven hlawh ber tur a ni ang.