Manchester United tan tun dinhmunah inrintawkna neih a harsa hle a, an player neih mekte dinhmun pawh zawhna zawt awm tak a ni mek a ni. Bournemouth laka mahni mualah 3-0 ngawta an tlawm ṭum khan United player-te chet dan a hniam hle a, player rating pawh a hniam hlawm hle a ni.

Hetiang a nih lai hian, MUTV-a pundit leh United player hlui Ben Thornley chuan he match-ah hian mi zinga rawn langsar bik leh fak phu a hmuh thu a sawi a, chu chu Portugal right-back Diogo Dalot-a a ni. Thornley-a hian Dalot-a ball khawih zui (end product) a fel tawk lo ṭhin tih pawm mah se, khelmual chhunga a ṭhanhnemngaihna leh a ṭan nasat zia chu a fak hle a ni.

Thornley chuan United-in anmahni TV channel an neih MUTV hnenah, "Khelmualah khan a chawl ngai lo hrim hrim a, inkhelh ṭan aṭanga minute hnihna leka kan ball nawr hmasak ber pawh kha a awmna lam aṭanga kal a ni. Stoppage time thleng khan a tlan na char char a, khelmualah a tlan kual zak zak a ni. A ball khawih tawp lamah khan tlem in a aia ṭha zawkin ti thei se la chu thil dang a ni ang, mahse kha match-ah khan Manchester United tlarhmaa che ṭha ber leh hlauhawm ber a ni tih chu sawi bo rual a ni lo," tiin a sawi.

Bournemouth nen an inkhelh ṭum hian Dalot hian ball vawi 92 lai a khawih a, hei hi khelmual chhunga player zawng zawng zinga ball khawih hnem ber a ni. Chu mai bakah, he inkhelah hian tlan chak ber niin 34.4 km/h a chakin a tlan a ni.

A ṭhanhnemngaih em em rual hian, goal zawn loah vawikhat a pet a, a ṭhiante tana chance a siamsak zat pawh vawikhat chiah a ni thung. Commentary-a rawn inlan Gary Neville chuan Bournemouth lam khan Dalot-a'n ball a chan khan goal an chhuah em em a ring lo ngei a, chuvangin ball a chan pawh an phal mai mai ni tura a rin thu a tarlang a ni.

Kum 2018 aṭang khan Dalot hi Manchester United-ah a awm tawh a, a ṭhanhnemngaihna leh a ṭan nasat ṭhin zia chu sawisel rual a ni lo. Mahse Bournemouth laka a chet dan erawh team tan chakna hmuh nan a tawk zo ta lo a ni.