Thawhlehni zan Champions League inkhel hmuhnawm bera Roma laka an chak ṭum khan, Manchester United tana langsar ber chu Matheus Cunha a ni. Si hnih faia an hnufual hnuah United chu a theihna zawng zawng sengin a rawn chhan chhuak a, mahse injury time-ah hnawhchhuah (red card) a nih tak avangin pitch sira advertising hoarding chungah ṭhuin match tawp lam second tlem te chu hmun hmawr aṭangin a thlir liam a ni.
Second half-ah khelmualah a chet phurh em avangin he Brazilian forward hnawhchhuah a nih hi mak tih vut vut tur a awm lo. United-in an siphurh an sut ṭanna tura penalty a hlawhchhuah khan, fan-te chawk phur turin ball chu mipui ṭhutna lamah a pet chho a ni. Hemi hnu hian Bruno Fernandes chuan penalty chu goal-ah a chantir a. Cunha-a'n an siphurh sutna goal a khung khan mipui lamah ball a pet leh a, chakna goal a khung hnuah a kawr hlipin mipui lawmna karah a tla lut hial a ni. Mahse, a phurna hian tawp chin a nei ta lo a, hun tawp dawn lama foul a neih zui tak avangin yellow card hnihna hmuin hnawhchhuah a ni ta nge nge a ni.
Hemi avang hian November thla tawp lama Lisbon-a Sporting CP an hmachhawn hunah Cunha hi a inlan thei dawn lo a, mahse Pathiannia Old Trafford-a Aston Villa an hmachhawn turah erawh a inlan thei thung ang. Tun kar chhung khan Michael Carrick-a dinhmun chu a lo chhanhim tawh a, tunah hian a vawihnih nan hetiang hian chet leh a tum dawn a ni.
Half-time thleng khan Roma lakah si hnih faia an hnufual avangin Carrick-a dinhmun hi a derthawng hle a, mahse an rawn kir leh theih tak avangin thawk lakna hun reilotê a nei ve ta hram a ni. International break neih hmaa a hna a chelh chhunzawm theih nan, kar khat chhunga vawihnih chak theih chu a mamawh takzet a ni. Villa laka an inkhelh tur hi Cunha tan chuan United tana a match 50-na chiah a ni tawh dawn a. Wolves aṭanga £62.5m ngawta an lakluh hnuah Thawhlehni zan kha match khata goal hnih a khung vawikhatna a ni bawk.
Carrick chuan he Brazilian hian Roma laka a theihna leh thaza phochhuah kha chhunzawm reng thei se a ti hle. Cunha chungchang sawiin Carrick chuan, "Kha a khelh dan ropui tak kha a tih nawn fo a ngai a ni. A ropui takzet a, a theihna sang ber a pholang a ni. Chu chu amah aṭang chauh ni lovin, team pum aṭanga kan hmuh duh chu a ni," a ti.
Cunha hian khelmuala a khelhna hmun nghet a la hriat chian loh avangin harsatna a tawk fo reng a ni. Manager hlui Ruben Amorim-a'n 3-4-2-1 formation-a No.10 hmunruak pahnih zinga pakhat luah tura a lakluh a ni a, mahse Carrick-a'n tlarhnung mi pali (back four) a hman leh takah chuan a khelhna nuam tih ber tur a la hrechiang hleithei lo a ni. Season liam ta khan left wing-ah hun tam zawk a hmang a, tun season ṭan tirh lamah erawh false nine-ah a khel bawk. Roma lakah khan he hmun pahnih hi a kual zung zung a, Carrick chuan kum 27 mi hian zalênna tam zawk a neih chuan a theihna sang a phochhuak thei ang tih a tarlang a ni.
Carrick chuan sawi chhunzawmin, "Matheus-a ṭhatna chu tlarhma hmun hrang hrangah a khel thei hi a ni. Season liam ta khan kan tan mual veilamah khel ṭhin mah se, a khel ṭha em em a. Lailiah pawh a inlan tawh a, Thawhlehni khan mual veilamah leh tlarhma laili inkarah a khel kawp bawk. Zalen taka a duh anga a kal kual theihna khan a inhmeh hle a, a pahnih hian a ti thei ve ve a ni. Chiang takin a ti thei ve ve a ni," tiin a sawi zui bawk.
