Manchester United chhuahsan a duh thu club hotute a hrilh hnuah, United academy rawlthar theihna ngah JJ Gabriel chuan tun hnaiah eng nge a tih a, engtin nge a inbuatsaih tih chu a pholang chhuak ta.

Thla liam ta khan he academy wonderkid hian United nena an inremna leh inziahluhna (registration) chu ṭhiahsak turin club hotute hnenah ngenna a lo thlen tawh a nih kha. He thil hi first team head coach Michael Carrick-a'n September thlaa Brighton an hmachhawn ṭuma senior squad-a koh tel a tum chiah laiin a rawn thleng a ni. Kha match-ah khan Gabriel hi inlan se chuan, Manchester United chanchina inelna tak taka inlan thei naupang ber (youngest ever player) a ni hial dawn a ni.

Thawhlehni liam ta khan kum 16 tling ve chiah he rawlthar hi Carrington training ground-ah a inlan leh tawh miah lo a. Chu ai chuan thla liam ta chhung zawng khan Spain rama Barcelona bul Castelldefels-ah mimal coach ruaiin a hrangin training a lo nei char char zawk a ni.

Gabriel hi Catalan club Barcelona bakah Real Madrid, Bayern Munich leh Paris Saint-Germain te nena sawizawm mek a ni a. Zirtawpni zing khan Instagram-a follower 40,000 nei 'J-Stars coaching' chuan he wonderkid training nei lai video hi an tarlang a ni. He video-ah hian Gabriel chuan a ke dinglamin David Beckham-a khelh dan ang chiah chiahin free-kick vawi hnih ngawt mawi takin a pet goal a, chu chu ama Instagram story lamah a lo repost ve leh bawk a ni.

Kum 16 a tlin tak avangin he attacking-midfielder hian European passport a nei thei tawh a, hei hian khawmualpui (continental Europe) lama club lian zawkte a pan duh a nih pawhin kawng a hawnsak dawn a ni.

Hetianga Barcelona khawpui kianga training nei a, La Liga champion Barca nena an chanchin sawizawm a nih mek lai hian, Barcelona sporting director Deco chuan Gabriel an ngaihven anga sawi chu a hnawl thung. Deco chuan, "He naupang chungchangah hian sawi tur engmah a awm lo. Player tam tak kan club nena sawizawm an ni ṭhin hi chu thil pangngai a ni a. Naupang te pawh nise hetiang atan hian transfer bazar a zau em em a ni. A dinhmun ang chiaha ding player hi kan ngaihven lo. Eng nge thil thleng mek pawh ka hre lova, Manchester United player a la ni em tih pawh ka hre hek lo," tiin a sawi.

Deco chuan sawi zawmin, "He thilah hian kan inrawlh ve lo hrim hrim. Engpawh tih hmain thil awm dan hi kan hriat chian hmasak phawt a ngai a ni. Rawlthar naupang te te chungchang sawi zui chiam hi kan hna a ni lo," tiin a sawi bawk.

A aiawhtuten Old Trafford-a cham a tum tawh loh thu fiah taka an tarlan tawh hnuah pawh, United chuan Gabriel hi chelh zui hram an la duh hle thung. Red Devils hotute chuan he naupang rilru hmin theih dan kawng an la zawng reng a, The Guardian-in a tarlan danin a contract thar ziah hmin tumin tun hnai khan scholarship contract thar an chhawpchhuak leh tawh a ni.

Chuti chung pawhin United hian an academy player theihna ngah ber chu zangnadawmna (compensation) £350,000 vel lek dawngin an chan mai dawn niin a lang a, United tan chuan chânna lian tak a tling thei dawn a ni.