Old Trafford-ah Manchester United chuan hun tawp thleng an beih hnuah Aston Villa nen an inhnehtawk hram a, stoppage time-ah goal hnih khungin 4-4 in harsa takin point an hlawh chhuak a ni. Match-ah hian United-in goal li (4) ngawt khung mah se, tlarhnung chet chhiat em avangin relegation zone huang chhungah an awm mek a ni.
Tun season chhungin inelna hrang hrangah Europe top-five league club zingah goal chhuah hnem ber an ni a, hei hian an tlarhnung thuam chak a ṭul tawh zia a tilang chiang hle.
Hetiang dinhmun tiak tak an din mek lai hian, Manchester United chuan Como defender Jacobo Ramon chu an tlarhnung thuamchak nana an lak luh tum ber zinga mi atanas dah in, The Peoples Person leh Spanish chanchinbu AS te tarlan danin, United hi he Spain defender lakluh tumnaa "ṭang ber leh bawhzui ngawrh ber" club an ni.
Kum 21 mi, feet 6 leh inches 5 (195cm)-a sang he Spanish centre-back hi Champions League-a Como-in United 4-1 ngawta an sawp ṭum khan mualah a che ṭha em em a, mualneitu team tana goal khungtute zinga mi a ni bawk.
Real Madrid youth academy chhuak Ramon-a chet ṭhatna hian khawvel football ngaihsakna a hlawh hle a, Spain senior team-ah pawh a vawikhat nan koh a hlawh phah hial a ni. AS-in a tarlan danin, Ramon hi January transfer window-ah chuan Giuseppe Sinigaglia chhuahsan tum lo mah se, nipui transfer bazar atan English Premier League club-ten an thlithlai nasa chho hle a ni.
Manchester United bakah hian Chelsea leh Liverpool te pawhin he player hmabak hi ngawrh takin an ngaihven mek bawk a ni. Tun dinhmunah chuan Chelsea midfielder hlui Cesc Fabregas-a hnuaia hmasawn mek Ramon hi Como-ah a rilru a fuk rih hle thung.
Mahse he transfer inelnaah hian Real Madrid an inrawlh ve thei tlat mai. Real Madrid hian 2025 nipui khan €2.5million chauhvin Como hnenah Ramon hi an lo hralh a, mahse he Spanish tlangval theihna sang tak an hriat avangin a rights zaa 50 (50 per cent) an kawl chhunzawm tlat a, chu bakah €10million bawr vela lei let leh theihna (buy-back option) an zep tel bawk a ni.
Los Blancos hian he buya-back clause hi hman an thlang a nih chuan, Premier League club lian te chet a buai vek thei dawn a, kumin nipui bazar thleng turah buaina leh inelna nasa tak chawk chhuakin United tan pawh chak taka hma lak a ngai dawn a ni.
