Tun kar tawpa Premier League-a Old Trafford-a Aston Villa an hmachhawn hunah Manchester United chuan lungawi lohna lantirna (protest) dang an hmachhawn leh dawn ta. "Manchester United hlutna, a vawn nun leh a tihdan phungte humhim tum underground group" tia inlosawi, fan-group lar 'The 1958' chuan neitute laka an lungawi lohna lantir nan United supporter-te chu protest nei leh turin an ko a ni.

Member 150,000 aia tam awmna he group hian Zirtawp zan khan ngenna thuchhuah siamin, stadium chhunga inkhel thlirtute chu green leh gold rawng ha ṭheuh turin an ngen a, hei hi hmasanga neitute an dodal ṭhina an lo hman tawh ṭhin thil a ni. Hemi bakah stadium chhungah pawisa sen hrim hrim pumpelh turin fan-te an rawn ngen tel bawk.

He lungawi lohna lantirna hi Reclaim the Stretford End, South Stand United leh Retro Reds te telna fan group hrang hrang thawhkhawm a ni tih 'The 1958' group chuan an sawi.

An lungawi lohna tarlan zinga pawimawh tak takte chu - tun a club neitute lo dodalna te, stadium thar sak tumna avanga Old Trafford ṭhiah mai theihna dinhmun awm chu duh lohna te, ticket kawltute laka zahneihna awm lo nia an ngaihna te, club chet ṭhat dan leh dinhmun tlakhniam zel te leh club bat (debt) belhchhah zel te an ni.

An thuchhuah chuan: "Team thlawp nan leh Old Trafford-a awm chhunzawm zel kan duh zia leh club neitute chhuak tawh se kan duh zia lantir nan nangmahni rualin belon, scarf leh kawrte rawn keng rawh u. Player-te inkhel tur mual chhunga an rawn luh hunah heng thilte hi vawrh chhuak rual ang che u," tiin fan-te a ngen a ni.

'The 1958' group hian September thla khan United-in ticket lehmang (tout) te an hmachhawn dan chungchangah protest an lo nei tawh a, ticketing system thar avangin supporter tak tak ten tuar phah zawkin an ngai a ni.

Season bul an ṭan chhiat em avangin Glazer chhungkua leh club co-owner Sir Jim Ratcliffe-a te an dodalna au hla te chu Old Trafford-ah hriat tur a tam tial tial bawk.

Tun kar tir lam khan Roma nena Champions League an khelh ṭumin, protest neih a nih zui avangin supporter ṭhenkhat chuan tennis ball te khelmual chhungah an vawm lut a, inkhel pawh a bahlah phah a ni. Hemi chungchangah hian Greater Manchester Police chuan khelmual chhunga thil vawm lut mi pathum an man (arrest) tih an nemnghet bawk a ni.