Manchester Derby-a VAR thutlukna dik lo tak vanga buaina leh lungnihlohna a chhuah hnuah, tun kar Carabao Cup inkhelah chuan Manchester United ṭantute tan chawlhhahdamna hun ṭha a inhawng dawn ta a ni.

Old Trafford-a Carabao Cup fourth round inkhel tur, Manchester United leh Brighton & Hove Albion inhmachhawnnaah hian VAR hman a ni dawn lo a ni. Hei hi fourth round inkhelh dang zawng zawng nena inmil thlap a ni a, a chhan chu he inelna round hmasa lam zawng zawngah pawh khan VAR hi hman a lo ni tawh lo hrim hrim a ni.

Season liam taa an lo kalpui tawh dan ang bawkin, 2026-27 season chhung pawh hian Carabao Cup-ah chuan semi-final stage aṭang chauhvin VAR hi hman ṭan a ni dawn a ni.

United hian Champions League an khelh avangin round thumna chu an khelh a ngai lova, kumin season-a he inelnaa Red Devils match hmasa ber tur a ni. Mahni mual Old Trafford-ah Premier League club tho Brighton an mikhual dawn a ni.

Football ṭantute tan chuan hei hi VAR vanga buaina, inhnialna leh hun khawhral rei lutuk awm lova inkhelh pangngai tak en theihna hun remchang tak a ni a; a bikin thutlukna dik lo a chhuah fo ṭhin avanga lungawi lo ṭhintute tan chuan thil lawmawm tak a tling ang.

VAR awm dawn lo mah se, he inkhel buaipuitu tur match official te chu puanzar an ni tawh a. Kar tawp inkhelh thil thlengte avanga referee-te ngaihven zual an nih lai takin, khelmual viltute tan pawh fiahna lian tak a ni dawn a ni.

Farai Hallam chu he match referee tur hian ruat a ni a. Hallam hian 2026-27 season chhung hian Premier League match hnih a lo vil tawh a, chung zingah chuan kar tawpa Chelsea leh Hull City inkhel pawh kha a tel a ni. Hemi bakah hian Championship match thum a lo vil tawh bawk.

A pumpuiah Hallam hian Premier League match pasarih lai chu a lo vil tling tawh a. Mahse, Old Trafford-ah emaw Manchester United match reng reng hetiang hmain a la vil ngai lo thung a, he Carabao Cup match hi a referee career-a a match lian ber a vilna tur a ni dawn ta a ni.

Tun hnaia referee-te chet dan leh thutlukna siam a ṭhat tawk loh fo ṭhin avangin, hetianga hmel thar hmuh hi thil duhawm tak a ni thei a. Referee ṭha zawk kan mamawh belh ngei bawk a ni. Hallam hian he hun ṭha hi hmang ṭangkaiin, ama puala hming chher tum lova match felfai tak a vil chhuah ngei beisei a ni.