Portugal squad aṭanga club legend Cristiano Ronaldo a inhnuhdawh hnuah, Manchester United captain Bruno Fernandes chuan Ronaldo nena an inbiak dan leh a ngaihdan a sawichhuak ta. Kar kalta chawlhkar tawpa Nations League-a Norway an hneh ṭum khan Ronaldo hi bench-ah dah a ni a, hemi hnu hian manager Jorge Jesus chuan ni tlemte hnu leha Denmark an hmachhawn turah bul a ṭan dawn lo tih a hrilh zui bawk avangin Ronaldo hian squad hi a chhuahsan zui ta a ni.
Ningani zan khan Nations League inkhelah Portugal hian 4-2 in Denmark an hneh a, hliam aṭanga dam chhuak hlim Fernandes pawh he match-ah hian a inlan hman a ni. Kum 41 mi Ronaldo hian a ram Portugal tan hian vawi 146 ngawt goal khung tawh mah se, United leh Real Madrid star hlui hetianga squad aṭanga a inhnuhdawh tak avang hian ram tana a hmabak tur chungchangah zawhna a piang nasa hle.
Tun kar tir lam khan he buaina chingfel tur hian hmanhmawh thilthu-in emergency meeting koh a ni a, mahse inremna an nei thei ta chuang lo. Hei hian Ronaldo-a international career hmakhua chu a tichiang lo zual a, social media lama a thuziakah kum 41 mi forward hian he thil thleng chungchang hi "a hun takah engkim a la puangzar vek dawn" tih a sawi chhuak bawk a ni.
Pathiannia Porto khawpui mualneitu nihna hnuaia Norway nena an inhmachhawn leh hmain he buaina hian hmun a luah lian hle a, match hma chanchinbumite kawmnaah Fernandes chuan he thil hi sawifiah a ngai ta a ni. "He thu hi a tawp thlenga titawp turin ka ṭhiante nena inbiak kher a ṭulna ka hre lo," tiin Manchester United captain chuan a sawi. "Kan dinhmun chu keimahni ngeiin kan enkawl thei a ni. He buaina hian player-te nen inzawmna a nei lova, keini tana thil pawimawh ber chu khelmuala result ṭha neih a ni," tiin a sawi.
Fernandes chuan Ronaldo a biak dan sawi zawmin, "Cris-a nen kan inbe tawh a. A hnenah chuan thil engpawh thleng se, Portugal tana a thil lo tih tawh zawng zawng leh khawvel huapa a sulhnu te avangin, kan ram leh national team tana chhinchhiahna ropui ber a nihna a bo ngai dawn lo tih ka hrilh a ni. Khawvela player ropui berte zinga mi a nih bakah, Portuguese mipuite thinlungah hmun nghet a nei reng tawh a ni," a ti.
United midfielder chuan sawi zawmin, "Keini chu kan inṭhen darh tur a ni lova, national team chu pumkhat kan ni. Thuneitu lam zawng zawng pawhin an buainate chu inkharkhip (behind closed doors) hnuaiah chinfel zawk tur a ni a, chutiang chuan thil a kal ngei ka ring bawk. Hemi chhungah hian player-te chu kan inrawlh ve lo va, lehkha den velin hun kan hmang zawk ṭhin a ni. Mipuite pawh ram anga inṭhen darh lo tur leh thlang bik nei lova, a khawi lam ve ve pawh pawm thiam turin ka ngen a ni. Cris hi kan national team leh khawvel football huanga chhinchhiahna ropui ber a ni reng dawn a, a duh zual leh duh lo deuhte pawh awm mah se, Portuguese mipuite zawng zawng zahna phu a ni reng a ni," a ti bawk.
Ronaldo-a nupui Georgina Rodriguez pawhin Al-Nassr forward leh coach Jesus te inkar a ṭhat loh zia pholangin, Instagram-ah post a siam hnu lawkah a delete leh a ni. "Engtin nge he pa hian Krista (Christ) hming hi a put theih zawk le," tiin a ziak a. Kum 72 mi Jesus hian Roberto Martinez-a thlaka Portugal head coach a nih hmain, season liam ta khan Al-Nassr-ah Ronaldo hi a lo enkawl tawh bawk a ni. Inrinni khan Jesus chuan he thu hi titawpin, "Engkim aia kan dah pawimawh ber tur chu kan national team a ni. Norway lakah chuan kan mipui leh ram puanzar, kan thiltumte chu a inmil vek a ngai a ni. Ronaldo chu kan ram chhinchhiahna a ni a, match zawhah chuan hemi chungchang sawiho nan hun tam tak a la awm ang," a ti ve thung.
