Manchester Derby-a thil thleng leh VAR thutlukna dik lo avanga buaina chhuak chu vawiin thleng hian a la sosang chho zel a, referee thuneitute lamin he thil thleng chungchangah hian hma an rawn la ṭan ta a ni.

Premier League matchweek 5 atana match official ruatte puanzar a nih khan, derby match-a VAR official Matt Donohue leh assistant Blake Antrobus te hming chu a lang ve ta lo a. Anni pahnih hi official ruat zing aṭangin chawlhkar khat chhung paih an ni rih a ni.

He hremna chawlhkar khat chhung pek hi a tawpna a ni dawn nge dawn lo tih erawh hriat theih a la ni lo va. Manchester United ṭantute lam erawh chuan referee lamin tihsual pui tham tak an neih hnuah chawlhkar khat chauh inkhelh vil thei lova dah an ni chu tling tawk lo leh nep lutuk nia ngaiin an lungawi lo hle a ni.

Referee lamin tihsual an neih ngei thu an pawm hnu hian thil thleng chhui chianna neih zelah eng nge lo chhuak zel dawn tih chu mipui ngaihven a hlawh hle a. A hmaa PGMOL tia lo hriat ṭhin, Pro Ref chuan Manchester City striker Erling Haaland-a goal khung kha pawm loh tawp tur a nih zia an pawm nghal thlap a ni.

He offside thutlukna tihsual chungchangah hian United fan-te chauh lo pawh mi dang tam takin an ngaihdan an sawichhuak ve bawk a. Manchester City goalkeeper hlui Joe Hart pawhin referee-te thutlukna chu pawmzam harsa a tih thu a sawichhuak a ni. Hart chuan chakna goal an khung dawn khan Enzo Fernandez chu chiang taka offside a nih bakah inkhelh kalphung tibuai zui (interfering with play) a nih avangin goal kha pawm tlak a ni lo tih a sawi.

City player hlui langsar Rodney Marsh pawhin he lungawi lohna hi rawn zawmin, Pro Ref hotupa ber Howard Webb chu a hna aṭanga bang turin a phut ve hial bawk a ni. Social media lamah Marsh chuan, "Ka damchhung hian khawi hmunah mah tu mihring mah a hna aṭanga ban turin ka la ngen ngai miah lo! Mahse Howard Webb-a chungchangah erawh chuan ka dan hi ka bawhchhiat a ngai ta a ni....." tiin a tarlang.

Tun thlengin Manchester United chuan Pro Ref lamin ngaihdam dilna an thehluh tawh chungchangah mipuite hriatah official takin thuchhuah engmah an la siam lo va, he buaina chhuak chungchangah hian referee hotu Howard Webb pawhin eng thu mah a la sawi chhuak lo bawk. Hemi rual hian Arsenal pawhin an inkhelh ṭuma referee lamin thutlukna dik lo an siamsak tawh chungchangah Pro Ref aṭang hian ngaihdam dilna an phut ve mek bawk a ni.