Pathianni inkhelah Manchester United-in 4-4 in Aston Villa an hneh lohna pumpelhin hleutling takin point khat an hlawhchhuak a, mahse hun tawp dawna Patrick Dorgu-a goal khung pawm a nih dan chungchangah Aston Villa director of football operations Damian Vidagany chuan Lammens-a'n dan a bawhchhiat avangin hei hi sulsut tur a ni tiin a chhuahchhal.

United hian corner aṭangin an goalkeeper Senne Lammens chu Villa box chhungah an nawr chho a. Ball rawn kal laiin Belgian keeper hian Villa goalkeeper Zion Suzuki chu a bawhbuai deuh a, hei hian Suzuki hi ball thlawh chhuah theih lohvin a ti buai a, Dorgu-a'n awlsam takin an siphurh sutna goal hi a tauh lut ta a ni.

Vidagany-a'n Premier League dan thar a bawhchhia tiin a sawi a: "Nipui chhung khan referee-te aṭangin tun season-ah chuan six-yard box chhunga intentional-a goalkeeper nawr emaw balance tihbahlah emaw chu phal a ni tawh dawn lo tiin min hrilh tawh a ni. Lammens khan ball pawh a en lo. Zion-a hip-ah tak khan a va su a ni. Match ṭha tak kan khel a, minute paruk hnuhnungah hian kan chet ṭhat zawk a ngai a ni. Kan penchhuak ang. Mahse dan chu dan a ni a, zah tur a ni. Chu chu thudik a ni," tiin a sawi.

Mahse Manchester United legend Roy Keane erawh chuan Sky Sports-a post-match an neihnaah chutiang an ngaihdan chu a pawmpui lo hle. Keane chuan, "Suzuki khan ball lak ngaihna hmun ṭha berah amah a inbik hman lova, ball hnuaiah tak a awm a, pen khatin hnunglam hlip a, ball attack zawk tur a ni. Mihring inlar tam mah se, football hi chu taksa in-tuhna (contact sport) a ni a. Keichuan buaina engmah ka nei lo," tiin a sawi thung.

Match inkhelh dan thlirin, Villa hian minute 4 pawh tling loah Alysson leh Nicolas Jackson-a te goal khung hmangin 2-0 in hma an hruai nghal der a. Bruno Fernandes-a'n penalty aṭangin goal khat a sut hnuah, half-time thlen hma chiahin Youri Tielemans chuan goal thun lehin 2-2 in an inhnehtawk.

Second half inṭan tirah Michael Carrick-a naute an phili lehpek a, minute 8-naah John McGinn-a'n penalty aṭangin goal a khung a, Leon Goretzka-a'n goal hnihna rawn thun belhin Villa hian 4-2 in hma an hruai leh a ni. Mahse United an beidawng duh lova, minute 92-naah Joshua Zirkzee-a'n goal a khung hmangin beiseina a rawn thlen leh a, minute 96-naah Dorgu chuan United tan goal pawimawh tak a rawn khung ta a ni. Goal thun a nih hnu hian Suzuki hian referee Chris Kavanagh hnenah lungawilohna lantirin yellow card a hmu a, VAR-in enfiah mah se goal hi pawm a ni ta tho a ni.