Manchester United head coach Michael Carrick chuan a team-te chu Premier League title chawi thei tura inelna kawngah "an la hla lutuk lo" tih a sawi.

Kum hnih kalta khan Omar Berrada chuan Old Trafford-a hnathawkte hnenah 'Project 150' chu a lo phochhuak tawh a, he ruahmannaah hian club din champha kum 150-na chiah kum 2028-ah Premier League nomawi chawi tura thil tum neih a ni. Kumin nipui chhung khan he thiltum chungchang hi an zawh nawn leh ṭumin Berrada chuan, "A theih phei chuan season tharah kan la ang a, a nih loh pawhin a dawt leh season-ah a ni ang. Dinhmun ṭha takah kan ding niin ka hria a, khelmualah pawh hmasawnna duhawm tak kan hmu a, hemi behchhan hian hma kan la chhunzawm zel bawk ang," a lo ti tawh a ni.

Mahse, United hian kum 40 chhunga Premier League-a bul an ṭan chhiat ber ṭum an tawng mek a, Atletico Madrid an hmachhawn hnuah Lisandro Martinez phei chuan nipui chhung khan squad thuamchak tawk a nih loh thu a lo tarlang tawh nghe nghe a ni. Player ṭhenkhat pawhin Sir Jim Ratcliffe leh Glazer chhungkua aṭangin tun season tana sum thehchhuah tam zawk an lo beisei bawk. Chutiang boruak karah chuan Carrick chuan sawiseltuten an sawi ang em ema beidawnthlak leh hla an nih loh thu a sawi ve tlat thung a ni.

Club kal dan phung thlirin kum 2028-a title lak tumna chu beisei theih a nih leh nih loh an zawhna chu chhangin Carrick chuan, "Tun hnaia kan kal dan sawi a nih hian thil thlir dan azir a ni ber ang chu. Inkhelh ṭhenkhat kan chak loh lai hun kan paltlang a, chu chu thudik a ni. Mahse, ka hriat sual loh chuan top four lakah point li chauhvin kan hnufual a ni lawm ni? Chuvangin thil thlir dan zau zawk neih a pawimawh a, football-ah chuan thil a inthlak chak em em a ni.

"January thlaa mawhphurhna ka lak ṭan lai khan pathumna dinhmun aṭangin tun aia hla feah kan awm a, mahse a tawpah chuan pathumna kan nihpui tho a nih kha. Chuvangin eng lam nge i ngaihven ber tihah a innghat a ni. Tihsual leh harsatna la awm chinfel ngai lam hlir i thlir a nih chuan rilru a buai mai ang, mahse thil theih leh hlawhtlin theih lam i thlir thung chuan rilru puthmang a dang hlak a ni.

"Kan tan chuan Premier League lak leh theih chu hmasawnna lian tak a ni ngei mai, chu chu kan tum ber leh kan beih ngawrh em em chu a ni reng a, kan nawr zui zel bawk ang. Champions League-ah game khat kan chak a, game khat kan tlawm bawk a. He inelnaah hian kan la awm reng a, Premier League-ah pawh a chung lam hauh tura elnaah kan la inrawlh reng a ni. Thil harsa tak chu a ni a, result a ṭhat tawk loh avangin mi zawng zawngin a chhe lai hlir an thlir ṭhin. Boruak her danglam chu keimahni kutah a awm a, thil thleng thei lo leh a hla lutuk a ni lo," tiin a sawi.

May thlaa a ngheta hna an pek laia Berrada emaw Jason Wilcox emaw ten 'Project 150' chungchang an sawipui em tih an zawh lehnah Carrick chuan, "He football club-a i awm tawh chuan thiltum chu hnehna chan reng hi a ni mai. Keima thlir dan chuan hun tiam chiah a awm lo, a rang thei ang bera tihhlawhtlin chu a ni zawk. Chutih rualin chu dinhmun thleng tur chuan pen khat zela hma kan lak a ngai tih kan hre thiam tlang vek a ni.

"Hun rei tak kan thlen tawh lohna hmun thleng leh turin team kan din mek a ni. Chu chu ka hria a, a chang chuan a vawrtawp thleng tur hian kawng hrang hrang leh kalkawng bumboh tak tak paltlang a ngai ṭhin. Chutiang kalkawngah chuan tunah hian kan kal mek a, he harsatna hi kan paltlang chho zel dawn a ni," tiin a sawi bawk.