Tun season-a an chet ṭhat tawk loh avanga sawiselna an tawh hnuah, Manchester United head coach Michael Carrick chuan international break kar thum chhung an neih chu an thil tihsualte inbihchian nan an hmang tih sawiin, khelmualah "meialh" (fire) anga nung leh phur taka khel turin a team-te a phut thu a tarlang.
United hian tun season match nga an khelh tawhah point 5 chauh an la hlawhchhuak a, inkhelh remchang tam tak an bawhpelh nual tawh a, vanduaina tawk zeuh zeuh bawk mah se beisei erawh an pha lo hle. Carrick-a naute hian tlarhma lamin goal thun theihna chance an siam tam viau rualin, khelmuala thawhrimna, tlan tam lam leh thawhhona (intensity) a tlem avangin sawisel an tawk nasa hle a ni.
Kum 45 mi Carrick pawh hian heng sawiselna hi a pawm ve deuh niin a lang a, a bik takin mahni mual Old Trafford-a Tottenham an mikhual tur aṭanga ṭanin, an khelh dan phung thlak a, taihmakna leh phurna nasa zawk nen an khelh a ṭul tawh thu a sawi a ni. Spurs an hmachhawn hnu hian khualmualah Atletico Madrid, Leeds United leh Como te an lenchilh zui dawn bawk.
Carrick chuan, "Kawng ṭhenkhatah chuan kan inbengdai thiam a, khawi hmuna thlen nge kan duh a, engtin nge kan thlen ang a, chumi thleng tur chuan eng nge mamawh tih pawh kan hria a ni," a ti. "Hmalam kan pan zelna turah kan khelh dan leh kan chet vel danah hian meialh ang maia phurna leh ṭhahnemngaihna kan neih a ngai a, kan theihna zawng zawng inphawrhchhuah sak tawn kan mamawh a ni. Chuvang chuan a aia ṭha thleng turin kan nawr reng a ngai," tiin a sawi.
International match schedule an siamṭhat avangin United hi kar thum ngawt inkhel lovin an chawl a. Chawlh an neih hmaa an game hnuhnung berah khan khatih laia table mawngphaha awm Fulham chu 1-1 in an inhnehtawkpui a, tun kar tawpah pawh hian mawngphaha awm tho Spurs chu an hmachhawn leh dawn a ni. Carrick chuan hetiang em ema chawlh rei hi duhthusam ni chiah lo mah se, he hun hi an hmang ṭangkai hle tih a sawi.
"Chawlh a rei hle a, ka thlir dan aṭang phei chuan a rei mah mah a ni. Mahse he hun remchang hi theih tawpin kan hmang ṭangkai thung," tiin Carrick chuan a sawi. "Hetiang chawlh a awm hian, kan chet dan thlir let nan leh hmabak ruahman nana hun ṭha a ni ṭhin. Tun ṭum phei chu a rei zual a, thil ṭha kan lo tih tawhte vawnghim chunga, result ṭha zawk kan neih theih nana kan tihsual kan siamṭhatna hun remchang min pe a ni," a ti bawk.
Season liam ta chanve hnuhnung lamah khan United hian kar khatah match khat chauh an khel tlangpui a, mahse tunah chuan Carrick-a tan fiahna thar a rawn inlar leh dawn ta. Champions League inkhel avangin kar laiah match an nei zut tawh dawn a, chutih rualin hliam tenauin an squad a tlakbuak ṭan mek bawk a ni.
Hemi chungchangah hian Carrick chuan squad siksawi leh insiamrem thiam a pawimawh thu sawiin, "Insiamrem a ngai ngei dawn a, training neih dan leh inkhelh ruahmanna siam dan pawh a danglam deuh dawn a ni. Tawnhriat ka lo neih tawhte aṭangin hetiang dinhmun hi ka lo paltlang fo tawh a, chuvang chuan thil thar a ni lo. Hliam hi chu football-a awm ve reng a ni a, engtikah nge a thlen dawn kan hre ngai lo. Inbengdaih a, balance ṭha neih a pawimawh ber," tiin a tlip.
