Manchester United striker hlui Dion Dublin chuan kum 1992-a a ke titliaktu Crystal Palace defender hlui Eric Young chu 'dawihzep' tiin a sawi chhuak a, hepa hi a be leh ngai tawh dawn lo tih a nemnghet bawk. He tackle na tak avang hian Old Trafford-a Dublin-a hun hman chhoh zel tur chu a chhe nghal vek a ni.
Professional football-a a zinkawng chu Norwich City-ah ṭanin, Dublin hian Cambridge United, Coventry City, Aston Villa leh Celtic te tan a khel kual a. Kum 2008 khan career goal 230 ngawt khungin football a chawlhsan a, hemi hnu hian media lamah lutin BBC-a 'Homes Under the Hammer' show host hna a thawk chho ta a ni.
Mahse a football nun hi a danglam daih thei a ni. Kum 1992 khan Sir Alex Ferguson-a hnuaia Manchester United zawmin tlarhma hruaitu ber nih tura beisei a ni a. Mahse vanduaina rapthlak tak a tawk ta hlauh mai. September 2, 1992 khan Old Trafford-ah United chuan Crystal Palace an mikhual a, first half tawp dawn lamah halfway line bulah Dublin chuan ball a dawng a.
Ball a khawih rual chiahin Young chuan na lutuk maiin a rawn tackle a, Dublin-a ke veilam ruh (fibula) a tliak a, a kerek thahrui (ankle ligament) pawh a chhe hle bawk. Zawn chhuah a ngai hial a, thla ruk dawn khelmual a chawlhsan phah a ni. A rawn kir leh hnuah United tan match 17 chauh a inlan hman a, a chhan chu a chawlh chhung khan Leeds United aṭangin Eric Cantona chu lakluh niin a hmun a lo luah hmak tawh a, Dublin hian Coventry City a pan a ngai ta a ni.
'In The Mixer' podcast-ah Dublin chuan sawiin, "Old Trafford-a ka debut match-ah ka ke veilam a tliak a. Kha khan ka career a titawp ti ila a sual lo ang. A hnuah ka khel leh ngei a, mahse [Eric] Cantona an tih pa kha a rawn lang a, ka tan kawng a ping ta nghal a ni," a ti.
Young-a lakah hian lungnihlohna a la nei reng a, Dublin chuan: "Ka ngaithei thlawt lo, mi dawihzep a ni. A be pawh ka la be ngai lo a, ka be ngai bawk hek lo ang. A rawn tackle dan kha 'scissor tackle' a ni a, sawi tlang dawn chuan dawihzep thil tih dik tak a ni. Ka ke veilam ka nghat nghet a, ball rawn thleng chu control tumin ka inher a, mahse ka kerek chu leiah a bet tlat a, ani chuan mi rawn keuh thlu tawpin a tlanbo zui daih a ni. Dawihzep a nih chu. Ngaihdam pawh min dil ngai lo. Ka ten hle mai," tiin a sawi.
1997-98 season khan Coventry tan khel chungin Dublin hian Premier League Golden Boot a la a (Michael Owen leh Chris Sutton te nen an inṭawm a ni). Premier League goal 111 lai khung mah se, United-a a hun tawi te chu a ui ber zinga mi a ni. "Sir Alex-a hnuaia khelh theihna leh khang player ropui tak takte bula awm theih kha ka CV-ah a chuang a, player ṭha zawka min chhuah tu a ni. Mahse 'Ui i nei em?' tia min zawh chuan, United-a ka cham chhoh zel theih dan tur kha a ni. Kum hnih leh a chanve chauh ka awm a; kum ruk, riat, sawmpahnih te lo cham thei ta ila engtin nge ni ang? Ka hre tawh dawn lo a ni. Andrei Kanchelskis leh Ryan Giggs te khan cross ṭha tak tak an rawn vawrh lut ṭhin a, David Beckham a rawn chhuak chho bawk a. Box chhunga lo awm tawp kha ka tan chuan tawk chiah a ni a, goal tam tak ka thun ngei ka ring; mahse kan hre tawh ngai dawn lo a ni," tiin a sawi.
Kum 2008-a a chawlh dan sawiin Dublin chuan a taksa chu a chhe hneh tawh hle tih a tarlang a. A season tawp lam kum nga chhung phei chu zing tin tui lumin a khup thleng chiahin minute 20 a awm phawt hnuah chauh training a neih theih thu leh, khup, kerek, nghawng leh dar ruh zai vawi tam tak a tawh tawh thu a sawi lang bawk a ni.
