Manchester United leh Manchester City tan ve ve lo khel tawh, Argentina forward hlui Carlos Tevez chuan a career chhunga a striker partner ṭha ber atan a ram neihpui Sergio Aguero aia Manchester United legend Wayne Rooney chu a thlang ta.
Tevez hi Manchester club pahnihte tana hlawhtling taka a khelh avangin fan-te zingah hming langsar tak a ni a. Old Trafford-a kum hnih chhung loan-a a awm lai khan, United hi Premier League title vawi hnih, Champions League, Carabao Cup leh FIFA Club World Cup nomawite a lo chawipui tawh a ni.
Hemi hnu, kum 2009 khan thawm ring tak karah an rival Manchester City a pan a, hetah hian a rampui Sergio Aguero nen kum 2011 aṭangin hun an hmang dun a. Mahse, City-a a ram neihpui nena inkar ṭha tak an neih chung pawhin, Manchester United-a a lo khelhpui tawh Rio Ferdinand-a YouTube channel ('Rio Ferdinand Presents') a inlan ṭumin Rooney chu a thawhpui ṭha ber a nih thu a sawi ta zawk a ni.
Aguero leh Rooney te inkar chungchang a hrilhfiahnaah, Tevez chuan: "An pahnih hian an danglam em em a ni. Mahse ka tan chuan player ṭha ber... a nih loh leh a thawhpui ṭha ber tih zawk tur em ni, a ṭha ber chu a ni chiang a ni," tiin Rooney-a hi a thlang ta a ni.
Tevez leh Aguero te hi kum 2011 aṭanga 2013 inkar khan City-ah an khel dun a, chumi hnuah Tevez hian Juventus a pan ta a ni. United-a a awm lai kha a career-a a hlawhtling zual lai niin, Cristiano Ronaldo leh Rooney te nen tlarhma hlauhawm tak an din a nih kha.
Ferdinand-a nena an inawmnaah Tevez chuan United tlarhma chungchang sawiin: "Thil tum em em pawh awm lovin Rooney leh Ronaldo te nen khan kan inkawp fuh em em a. Kei leh Rooney hi street player, tharum hmang leh kawlh tak kan ni a, Ronaldo-a'n mawi takin team boruak a rawn tundawng thung. Chutih laiin midfield-ah Carrick, Giggs, Scholes te kan nei bawk a, a ropui takzet a ni," a ti.
Sir Alex Ferguson-a ruahmanna (tactics) chungchang pawh Tevez hian a sawichhuak a. Fergie-a'n an pathum tana ruahmanna bika a siamsak em tih Ferdinand-a'n a zawhna chhangin, "Siam eih lo! Fergie-a mizia chu i hriat kha. Mualah kan lut a, kan inmelh a, keimahniin inkhelh dan tur kan inremsiam mai ṭhin. Ronaldo kha mual dinglamah a khel ṭhin a, mahse a duh hunah laili-ah a rawn lut a, Rooney mual dinglamah a chhuah loh leh keimah zawkin laili-ah ka lo luah thung ṭhin," tiin tactical freedom an neih dan a sawi.
Ferdinand chuan kumin tir lam khan Rooney pawhin Tevez chu a striker partner hlu ber leh khelhpui nuam ber a nih thu a lo hrilh tawh thu a sawichhuak a. Tevez pawhin an pahnih inkar chungchang sawiin, "A chhan chu a bula khelh kha ka tan a awlsam em em a ni. Football a hmangaihna leh a phurna ang chiah kha kei pawhin ka nei ve tlat a ni," tiin an inthlawp ṭhat dan a sawi zui bawk.
