Kum sawm kalta chhung khan Manchester United chu buaina leh thawnthu inthlak zut zutna hmunpuiah a chang a, thil thleng ngai bawk a thleng nawn leh mek a ni. Chanchinbu mite leh media lam chuan Michael Carrick chu ban tura nawrin, thawnthu thar ṭan lehna turin boruak an siam nasa hle a ni.
United match khelh leh tur, Tottenham nena an inhmachhawnna tur phei chu manager pahnihte laka pressure a san em avangin 'El Sackico' ti hialin an phuah tawh a. Chanchinbu leh website hrang hrangah 'Michael Carrick sack' tih thupui chu hmuh tur a tam hle tawh a ni.
Mahse, Manchester United ṭantute erawh chuan media ngaihdan hi an la ṭawmpui ve chiah lo thung. TalkingPoints-a ngaihdan thawhtu United supporter pakhat chuan Carrick ban theihna chungchang sawiin, "Kha kha chhanna a nih ka ring lo," tiin a tarlang.
Kar tawp khan United chuan Fulham lakah point khat an hlawhchhuak hram a, hei hian Carrick-a laka sawiselna chu chawplehchilha thil thleng tur lakah a veng rih deuh a; mahse Carrick tan hian ngaihtuahawmna a la kiam chuang lo. Tottenham an hmachhawn hnuah Leeds United tlawhin an zinchhuak ang a, October thla chhungin Bournemouth leh Chelsea te an hmachhawn zui bawk dawn a ni. Heng inkhelte hi an tan fiahna khirh tak a tling dawn a ni.
Heng match harsa tak takte hian club season chu a ṭha zawngin a herletpui thei a, a nih loh pawhin Carrick-a tana tawpna a thlen thei bawk ang. Hetiang boruak hi a hmain lo thleng fo tawh ṭhin a nih avangin, thil thleng nawn leh ta pawh nise a mak tehchiam lo ang.
Jose Mourinho, Ole Gunnar Solskjaer, Erik ten Hag leh Ruben Amorim te pawh kha season lai lailin ban vek an lo ni tawh a. Hetianga an lo kal tawhna kawng bawk Michael Carrick-a'n a zawh leh mai ang tih chu hlauhthawnawm tak a ni.
Media lamin United buaina leh Carrick-a ban theihna boruak chu hmuhnawm ti taka an chhawpchhuah laiin, supporters lam erawh chuan chutiang chu an ngaihtuah ve lo thung. Manchester United fan-te chuan an club hlawhtlinna an duh ber a, Carrick-a lakah rinhlelhna tlem nei mah se, a hlawhchhamnaa lo lawm tur khawpin rilru an pu lo a ni.
Media leh ṭantute ngaihdan inthlauhna lai ber pawh hei hi a ni. United hian a tawpah Carrick hi an ban leh a nih pawhin a duhawm dawn lo hle a. Media-in thil thleng engkim chu infiamna drama ang maia an en laiin, fan-te tan erawh chuan beiseina nena bul an lo ṭan pui tawh project dang a thi leh ta tihna a ni dawn a, an tan chuan lungngaihna a ni zawk ang.
Chutih rualin, hetianga chet chhiatnaah hian transfer window chhunga Carrick mamawh tawk player la lut lo tu Ineos lam chu thiam loh chantir zawk awm an ni bawk a ni.
