Manchester United rawlthar theihna ngah tak JJ Gabriel-a'n club a chhuahsan a nih chuan, a kalsawn theih nana lo puitute lakah dan anga hma lak (legal action) mai chu Manchester United chuan an ngaihtuah mek nia tarlan a ni.
Kum 15 mi rawlthar hian thla liam ta khan Old Trafford chhuahsan a duh thu Red Devils hotute hnenah a lo thlen tawh a, club-a a inziahluhna (registration) tihtawp a tum bawk a ni. He thil thleng hian United hotute a ti-bangbo hle a, a chhan chu he rawlthar hian chhuah a duh thu a tarlan hma lawk khan Carabao Cup-a Tottenham Hotspur an hmachhawn ṭumah khelh tura ruahman a nih vang a ni. Spurs laka a inlan hman hlauh chuan Gabriel hi United chanchina senior match khel thei naupang ber a ni hial dawn a, mahse chhuah a duh thu a lan chhuah tak chinah erawh first team tan hian a inlan leh ta miah lo a ni.
Chuti chung chuan United lam chuan Gabriel-a contract neih mekah hian hun a la neih avangin, he buaina hi khelmual chhung leh pawnah siamṭhat theih a la nih an ring fan a ni. Kum 2010-a piang star naupangte hian a khawi lam ve ve mahin remtihna an neih loh chuan ama thuin club-a a inziahluhna hi a sut ngawt thei lo a; mahse, kar thara kum 16 a tlin hunah erawh chuan Irish passport a neih kawp avangin ram pawn club-te nen inbiakna an nei thei tawh thung ang.
Ram pawn club hrang hrangte hnena a insawn a nih hlauh chuan, United hian a enkawl man (compensation fee) tlem te chauh an dawng dawn a ni. Tun dinhmunah hian Real Madrid, Barcelona leh Bayern Munich te chu Gabriel-a lakluh duhtu langsar zual an ni mek bawk.
He thil thleng avang hian The Sun chanchinbu chuan, England Under-17 player Gabriel-a'n Old Trafford a chhuahsan theih nana lo dawrtu emaw kawng lo hawnsaktu tupawh lakah regulatory leh legal action lak dan tur United hian an ngaihtuah mek tih an tarlang a ni.
Gabriel-a aiawhtu Ali Barat chuan he midfielder naupang theihna ngah takin United chhuahsan a duh tih a lan chhuah hnu khan Football Association (FA) hnen aṭangin naupang aiawh theihna phalna a la fel a. Barat-a agency Epic Sports hian kumin nipui chhung khan Real Madrid-a Denzel Dumfries-a luhna leh Aston Villa-a Nicolas Jackson-a luhna kawngah sulsutu an lo ni tawh a, tunah hian Gabriel-a aiawhin Los Blancos (Real Madrid) leh Bayern Munich te nen inbiakna an lo buatsaih tawh bawk a ni.
Gabriel hian United-a cham zui a tum loh zia ti lang chiangin tun kar khan ram pawn lamah training a nei zui a. Kumin nipui pre-season hmaa a lo hman ṭhinna hmun, Barcelona-a training facility pakhatah a lo inbuatsaih mek a ni.
Gabriel-a hmabak chungchanga thu thang a tam hle laiin, United head coach Michael Carrick chuan thla liam ta khan inbengdaih a ngaih thu a lo sawi tawh a. Carrick chuan, "Tun kar tir lama ka sawi tawh ang bawk kha ka rawn sawi nawn leh ang: ani chu mipa naupang mai a la ni a, chanchinbu hmai leh pawn lam boruakah thil tam tak kan thehdarh loh hi a pawimawh a, hetianga thil sawizui vak hi kan fimkhurpui a ngai a ni. Rilru puitling tak pu chungin ama tan thil ṭha ber tur kan ngaihtuah a ngai a, he thil pawh hi a fel chho ve leh mai ang," tiin a lo sawi tawh a ni.
Gabriel hian thla liam taa UEFA Youth League-ah United Under-19 team-in 5-0 a Sabah an hneh ṭum khan club tan inkhel a hmachhawn hnuhnung ber a ni.
