Thawhlehni Champions League inkhelah Roma lakah hnehna ropui tak chang mah se, Manchester United manager Michael Carrick-a dinhmun chu a la derthawng reng a, Pathiannia Aston Villa an hmachhawn turah result ṭha a mamawh belh ngei a ngai dawn a ni.
Tun hnai kar liam ta chhung khan Carrick-a hmabak hi sawi zui a hlawh hle a; Como leh Bournemouth lakah goal thum fai ve vea an tlawm zawn hnuah ban tawk chiah chiah dinhmunah a ding hman a nih kha. Roma an tawn hma kha chuan kar thar lamah ban a nih tawh ngei beiseitu an tam hle a, mahse hnehna an chan tak avang khan thil kalhmang a ziaawm deuh rih a ni.
United thuneitute chuan club chhung buaina leh Carrick-a mamawh hmanraw ṭha an pek tawk lohnaah mawhphurhna nei ve mah se, he buaina kar aṭanga club khai chhuak tur hian kum 45 mi hi a tlak tak tak em tihah tun kar tir lam khan rinhlelhna an nei lian hle a ni. Manager thlaktu tur dang pawh an lo thlithlai nual tawh a, mahse thlaktu tur chiang tak an la neih loh avangin ban nghal ngawt chu an hmachhawn hreh deuh a ni. Director of football Jason Wilcox chuan Brighton boss Fabian Hurzeler chu a ngaihsan em em thu hriat a ni a, Villa Park-a Unai Emery-a hnathawh dan pawh United hotute chuan an fak hle bawk. Mahse heng manager-te pahnih hmin a, an club hnenah zangnadawmna (compensation fee) tam tham tak chawi chu thil theih a rinawm loh hle.
Chuvang chuan inthlakna a awm a nih pawhin Eddie Howe leh Julian Nagelsmann te chu hmahruaitu ber an la ni reng a, tun kar tawpa Carrick-a chet dan hian thutlukna siam kawngah nghawng lian tak a nei dawn a ni. International break zawh hnuah United hian chawl lovin kar thum chhung midweek match an khelh zawn a ngai dawn a, December 14 hma chu chawlhna hun a awm dawn lo. Chuvangin November thla chawlh hi manager thlak duhte tan chuan hun remchang ber a ni ang. Pathiannia Villa lakah Carrick-a naute an chak a nih chuan, chawlh zawha Anfield-a Liverpool an tlawh hunah pawh Carrick hi a la ṭhu zui ngei tura ngaih a ni a; mahse an tlawm a nih erawh chuan a dinhmun a derthawng leh nghal hle ang.
Hetih lai hian, Roma laka an chak ṭuma rawlthar Shea Lacey-a chet ṭhatna chuan Ireland ram thlengin beng a verh hle a. Ningani khan Republic of Ireland boss Heimir Hallgrimsson hnenah kum 19 mi hmabak chungchang hi an zawt hial a ni. Lacey hi Liverpool-a piang niin England youth team-ah a inlan ṭhin a, international break liam taah pawh Under-20 tan a che ṭha hle. Mahse a pa Paddy vangin Ireland tan pawh a khel thei tlat a ni. Hallgrimsson chuan Lacey chu an la biak pawh loh thu leh association mi dangte buaipui tur a nih thu sawiin, Ireland nena an inzawmna erawh ngaihvenawm a tih thu a sawi. Lacey hi tun break atan hian England Under-20 squad-ah koh a ni leh tawh bawk. Carrick chuan Lacey chungchang sawiin, "A mitah hian eng emaw tle deuh a awm a, thil phunchawng leh chimawm deuh rawngkai hian a khel ṭhin a ni," tiin a theihna chu fak hle mah se, Como lakah minute li leh Bournemouth lakah minute 12 chauh a chhawr avangin Villa lakah bul a ṭantir dawn em tih chu zawhna lian tak a ni.
Khelmual pawn lamah pawh United hian buaina an hmachhawn dawn niin a lang. Roma laka red card hmu Matheus Cunha chuan match zawha mual chhunga a luh leh avangin UEFA charge a pumpelh hlauh a; mahse Stretford End-a Glazer chhungkua dodaltu fan-ten minute 21-naa tennis ball khelmuala an theh luh avangin United hian UEFA hremna an pumpelh a rinawm loh thung. UEFA Disciplinary Regulations Article 16(2)(b) dan hnuaiah khelmuala thil vawm luh hi dan bawhchhiatna lian tak a ni a, club-in mawh an phur tlat a ni. Villa match-ah pawh Glazer-te enkawl kum 21-na entir nan minute 21-naa stadium chhuahsan (walk-out) rawtna a lian hle a, inkhel en ziah ṭhinte leh online lama au ringte inkarah ngaihdan a inang lo hle bawk.
Roma an hneh ṭum khan Amazon Prime-in video an tarlanah pundit Wayne Rooney, Nicky Butt leh Ashley Young ten dugout bula Cunha-a goal an lo lawmpui dan chuan ngaihven a hlawh hle a, Peter Schmeichel pawhin United scarf awrhin phur takin inkhel a thlir bawk. United hian Pathianniah Villa hi an hneh ngei a nih chuan boruak muang tak hnuaiah Carrick hian a hna a chelh chhunzawm thei dawn a ni.
