Manchester United rawlthar theihna ngah tak JJ Gabriel-a hmabak chu Old Trafford piah lamah a awm dawn niin a lang chho mek a. Thla hmasa khan he kum 16 mi hian a contract neih lai tihtawp a, club thar zawn a lo dil tawh a ni.
He rawlthar thil ngen hian Europe club liante ngaihven a hlawh nghal hle a. Nikum lawk pawh khan Manchester City chuan Gabriel hi lakchhuah an lo tum tawh a ni. Chutih rualin tun dinhmunah hian Barcelona, Bayern Munich leh Real Madrid te pawh he rawlthar lakluh theihna kawngah hian sawizawm an ni mek bawk.
Kar thum chhung ram aiawha chawlh (international break) an neih chhung khan Gabriel hian a piancham a lawm a. Ningani khan United lamin he rawlthar hnenah hian scholarship offer thar an chhawpchhuak tih tarlan a ni bawk a, chanchinbumite pawhin he rawlthar hmabak chungchang hi Michael Carrick-a zawh nan hun remchangah an hmang ta nghal a ni.
Carabao Cup-a Brighton laka United an tlawm ṭum khan Gabriel hi a senior debut siam tura ngaih a ni hman hle a. Mahse khelmualah a inlan ta miah lo a, hei hi training a zawm duh tawh loh bakah club chhuahsan a dil vang nia ngai an tam hle a ni.
United thil tum danah chuan first-team-ah minute tlem a zawn pe chhoin, Gabriel hi puitling taka chher chhoh zel an rilruk a. Mahse he rawlthar hian a pa nawrna leh thununna avangin nghah a peih ta lo niin an ngai a ni. Zirtawpni khan Brighton laka a inlan loh chhan hi chanchinbumiten Carrick chu an zawt nawn leh a ni.
Carrick chuan chhangin, "City match hnu kha a nih ka ring a, khang ni chhung khan kan kiangah a awm meuh lo hrim hrim a, chuvang chuan thil hi a inthlak danglam thei reng a ni," tiin a sawi.
Carrick chuan sawi chhunzawmin, "Player naupangte tan hian ruahmanna leh ngaihdan hran hran kan nei reng ṭhin a, squad-ah an tel emaw, an tel lo emaw pawh nise ruahmanna chu a awm ṭhin. Mahse kha tih hun lai kha chuan engmah thil chiang fak a la awm rih lo hrim hrim a ni," a ti bawk.
Gabriel hian Barcelona, Bayern Munich emaw Real Madrid te pan theihna remchang nei mah se, football khawvelah chuan chianna engmah a awm ngai lo. United tan pawh Gabriel emaw a kianga awmte hian club-a awm zui an duh lo a nih chuan, academy aṭanga chher chhoh tur naupang theihna nei dang tam tak an kawl tho a ni.
Thil thleng mek hi a pawi hle a, mahse thil a inthlak danglam thei tih Carrick-a thusawi ang hian boruak a la danglam thei bawk. Gabriel-a aiawhtute hian United-a cham zui hi duh tak tak nise chuan, tun dinhmunah hian first team tan a inlan hman tawh ngei a rinawm a ni.
