Manchester United chet chhiat chhoh mek dan hian kil hrang hrang aṭangin sawiselna a tawk nasa hle a. Tun dinhmuna hlamchhiah theih miah loh thil pakhat chu khelmuala an player-te tlan tam dan (running statistics) hi a ni.

International break kan hman hma khan, Sky Sports chuan Premier League huangchhungah chak taka tlan (high-intensity runs) kawngah United hi a hniam ber dawttu an nih thu a lo tarlang tawh a ni.

Tottenham nen 1-1 a an inhnehtawk hnu khan Manchester United defender hlui Gary Neville chuan na takin a sawisel a: "Fan-te hian theih tawp chhuah lo anga lang hi an pawm thei ngai lo ang. 'Theihtawp chhuah loh' tih ṭawngkam hman hi ka duh lem lo na a, mahse a takah chuan an tlan tlem lutuk a ni, tumruhna, inpekna leh beihlet duhna rilru an lantir tawk lo takzet. An nei lo tawp mai a ni," tiin a vawrh chhuak a ni.

Minute 90 leh stoppage time chhung khan United hi Tottenham aiin kilometre nga (5km) zetin an tlan tlem zawk a ni. FotMob data aṭanga a lan danin, Tottenham laka United player tlan thui ber pathumte pawh Spurs lam player tlan thui ber pathumte lakah an la tluk lo zawk cheu a ni.

Pundit Jamie Redknapp pawhin United player-te tlan tlem lutuk chu a hrethiam lo hle a, "Spurs kha Man United aiin 5km zetin an tlan tam zawk a... match tinah hian hetiang hi an ni ziah mai!" tiin a ngaihdan a sawi chhuak bawk.

Manchester United player-te hian hmelmate nawr chep turin theihna an nei tawk lo tih a lang chiang hle a. Player hming lian neih emaw transfer fee to tak sen ringawt hian hlawhtlinna a keng tel kher lo tih a chiang hle bawk. Hei hi season ṭan tirh te aṭang khan a lang chiang tawh a, opening day-ah khan Premier League lama kaisang thar Hull City lakah Michael Carrick-a naute hi 2-0 ngawtin an lo mualpho tawh a nih kha.

Buaina lian ber chu, khatih hun aṭang khan siamṭhatna hmuh tur a la awm meuh lo hi a ni. United hi an hmachhawn apiangte aiin khelmualah an thawkrim lo zawk ziah a, hei hian Carrick-a team tan chona khirh tak a siam phah a ni. Tunah hian Premier League table-ah 13-na dinhmun an luah mek a, sawisel ngaihna an nei lo a ni.

Kar thar kar tawpah hian an elpui lian Leeds United an hmachhawn dawn a, point thum hmuh an duh a nih chuan ngawrh taka an beih a, an thawhrim a ngai tawh dawn a ni.