Manchester United chuan an academy chhuak goalkeeper kum 19 mi Will Murdock chu January ni 5 thleng daih tur youth loan hmangin Hednesford Town-ah a chhuak tih an nemnghet ta.

He loan move hi Murdock-a'n United nena contract thar a ziah hnu lawka thleng a ni a. Manchester United academy rank hrang hrang a paltlang hnuah, rawlthar keeper tan hian senior level-a a vawikhat nan loan-a a chhuahna hmasa ber a ni bawk.

'The Pitmen' tia hriat lar Hednesford Town hi National League North inelna lama khel mek an ni a. Southampton goalkeeper hlui Kelvin Davis-a enkawl mek an ni. He loan hun chhung hian Murdock-a tan Old Trafford leh Carrington academy huang chhung piah lamah senior match khelhna hun ṭha leh tawnhriat thar hlu tak a pe dawn a ni.

Murdock hi kum 2025 FA Youth Cup-a United-in semi-final an thlen theih nana che pawimawh tak a ni a, semi-final-ah hian Aston Villa lakah an tlawm a nih kha. A hnu lamah Youth Cup squad-ah hian Cameron Byrne-Hughes lakah a hmun a chan deuh mah se, United-ah hmasawn zelin Under-21 squad lamah a inhlangkai chho zel a ni.

Tun season chhung pawh khan Murdock hian United Under-21 tan match khat a khel tawh a; thla liam ta tawp lama Leicester City laka 4-1 a an chak ṭum khan khelmualah a inlan a ni. Chu mai bakah Northern Ireland tan Under-16, Under-17, Under-18 leh Under-19 level-ah te ram aiawhin a lo inlan tawh bawk a ni.

Hednesford Town tana Murdock-a a inlan hmasak ber theihna hun hi a inherchhuak thuai dawn a, FA Cup second qualifying round-ah Coventry United an hmachhawn dawn a ni. January ni 5 thleng daih tur he inremna hian United goalkeeper naupang zawk hi senior football tualzawla a theihna pholanna hun ṭha a hawnsak dawn a ni.