Wolves leh Middlesbrough manager hlui Rob Edwards chuan Manchester United-in Manchester City laka 1-0 a hnehna an chan loh dan chungchangah, United head coach Michael Carrick chu a "hrehawm pui takzet" (feels sick) thu a sawi chhuak.

Pathiannia Old Trafford-a Manchester derby inkhelah, minute 23-na aṭanga mi 10-a khel Man City chuan minute 60-naa Erling Haaland-a goal khung hmangin hnehna an chang a ni. Josko Gvardiol-a cross rawn per chu he Norwegian striker hian goal ban hnunglam (far post) aṭangin a lo pet lut a, assistant referee chuan offside tiin a vawrh nghal a nih kha.

Mahse VAR chuan khelmuala thutlukna siam chu thlakin, Haaland hi a offside loh thu leh, offside dinhmuna lo awm Enzo Fernandez chuan ball a khawih loh bakah United defender Lisandro Martinez-a chet vel a tibuai lo tiin goal hi an pawmsak ta zawk a ni.

He inkhel zawh hnu hian referee thuneitu lam Pro Ref chuan United hi be pawpin, goal an pawm chungchangah khan "ngaihdan dik tawk loh vang" (error of judgement) a nih thu an pawm a. Fernandez-a'n Martinez a tihbuai avangin khelmuala assistant referee thutlukna siam offside kha nemnghet zawk tur an nih thu an hrilh a ni.

He thil thleng chungchang hi sawiin Edwards chuan Sky Sports hnenah, goal an pawmsak dan leh match zawha Pro Ref thuchhuah siam avang hian Carrick chu a thinrim hle a rin thu a sawi:

"A dik alawm, a tan [Carrick] hian hrehawm ka tihpui takzet a ni. Club pahnih tan game pawimawh leh lian tak a ni a. Mahse khatiang goal vanga tlawm zawk nih kha chu a na vawng vawng ang.

"A na takzet ang. A rawn inlan hian a rilru puthmang a tilang ngai lo tih ka hria... A lungawi lo tih chu a hriat theih a, mahse a inbengdai hram hram a ni. Chutih rualin a chhungrilah erawh chuan a thinrim alh hial ang.

"Khatiang tihsual lian tham kha chu a awm thei lo a ni. Premier League-a Manchester derby a nih vang pawh a ni lo; khatiang tihsual lian lutuk kha chu an ti tur a ni lo hrim hrim, tu team tan pawh nise a theih loh," tiin a sawi.

Haaland-a goal mai bakah hian inkhel chhungin inhnialna dang pawh a chhuak bawk. Minute 23-na lekah Phil Foden chuan Bruno Fernandes-a laka a chet dan avangin direct red card a hmu a. Touchline sirah Fernandes-a'n Foden hi a titlu a, United captain hian chhuata ṭhu City player hi a pet hmasa ni awm takin a lang. Mahse Foden hian a thinrimna insum zo lovin ke hnihin Fernandes-a dul hnuai lamah a lo chhuih let a, Portuguese midfielder hi a tlu zui nghal a ni. Referee Michael Oliver chuan Foden hi red card pe nghal mah se, Fernandes-a chet hmasak dan erawh hrem a ni zui lo thung.

He inkhela an tlawm tak avang hian United hian match li an khelh tawhah point 4 chiah an la hmu a, Premier League table-ah 13-na dinhmun an luah mek a ni. Hull City leh Man City lakah tlawmin, Everton an draw pui a, Ipswich Town lakah chiah hnehna an la chang a ni. Season bul an ṭan ṭhat tawk loh avangin Carrick-a hian pressure tlem a hmachhawn ṭan mek a, Nilaini hian Carabao Cup-ah Brighton an mikhual dawn a, Pathianni hian Premier League-ah Fulham an pan zui bawk ang.