Manchester derby-a VAR tihsual lian tak thleng chungchang chu Pro Ref Chief Refereeing Officer Howard Webb chuan Thawhlehni hian mipui hmaah a sawifiah dawn ta a ni. Pathianni inkhelah khan player 10-a khel Manchester City chuan Erling Haaland-a goal khung hmangin Manchester United lakah 1-0 in hnehna an chang a nih kha.

He inkhela goal awmchhun hi second-half-ah lutin, Josko Gvardiol-a ball cross per chu Norway international striker Haaland chuan goal ban hnunglam (back post) aṭangin a pet lut a ni. Assistant referee chuan offside tiin a lo vai nghal a, mahse VAR chuan khelmuala thutlukna siam chu rawn siksawiin goal a nih thu an puang ta zawk a ni. VAR chuan Haaland chu onside-ah a awm a, offside dinhmuna awm Enzo Fernandez chuan ball a khawih loh bakah United defender Lisandro Martinez chu a tibuai (interfere) lo tiin an chhut a ni.

Mahse inkhelh zawh hnuah Pro Ref chuan Manchester United hi be pawpin, goal pawm a nih chungchangah khan 'hriatsual leh ngaihdan dik lo' (error of judgement) a awm tih an pawm thu an hrilh a. Fernandez khan Martinez kha a tihbuai ngei avangin assistant referee-in offside a lo pek sa kha ngai reng tura tih zawk tur a nih thu an tarlang a ni.

The Sun-in a tarlan danin, Webb chuan tun season-a 'Match Officials Mic'd Up' show hmasa berah he thil thleng zawng zawng hi TV camera hmaah a sawifiah vek dawn a ni. Stockley Park-a video booth aṭanga VAR official pahnih Matt Donohue leh Blake Antrobus te nena referee Michael Oliver inbiakna recording zawng zawng pawh Webb hian a ngaithlatir dawn bawk a ni. He thil thlengah hian Donohue leh Antrobus te chu match referee hna aṭangin chawlhtir an ni nghal bawk.

Pro Ref hotute leh referee Oliver pawhin goal an pawm hnu lawk khan tihsual lian tak a thleng tih an hre nghal a. Inkhelh zawh aṭanga darkar thum hnuah thuchhuah siamin tihsual a awm thu an puang a, Webb chuan nakina hetiang thil a thlen nawn tawh loh nana hmalakna turte pawh a puangzar tel dawn a ni.

Pro Ref aiawh chuan, "Pathiannia Manchester derby inkhelh zawh hnu khan Matt Donohue leh Blake Antrobus te chu kar tawp inkhelh turah mawhphurhna pek an ni ve lo. Chief Refereeing Officer Howard Webb leh management team-te thutlukna siam a ni a, Manchester United leh Manchester City inkhela VAR leh AVAR mawhphurhna latute hi international break zawh hma chu match an enkawl rih dawn lo a ni," tiin an puangzar.

United manager Michael Carrick erawh he thutlukna avang hian a lawm lo hle a, VAR hrilhfiahna chuan "thil a tichhe lehzual" tiin a sawisel bawk. Carrick chuan, "Referee-te thutlukna puih nan khelmualah ruahmanna hrang hrang kan dah a, screen engzat nge awm a, office engzat nge awm a, office khawiah emaw mi engzatin nge thutlukna siam tura ṭhu khawm?

"Football khelh dan phung hrilhfiah dan hi a nihna takah chuan a ngaihtuahawm zawk a ni. Football hrethiam tura ruat leh thutlukna siamtu turte ngaihdanah, ball aṭanga tawngpawng tawngkhat leka hlaah taksa pum zawng thehthanga i inlan a, a bula defender-in chumi chu a lo chhanlet (react) a ngai a nih lai pawha inkhel tibuai lo anga ngaih a nih tlat chuan a ngaihtuahawm hle a ni.

"A mak thlawt a ni, khatianga an thlir liam mai thei kha ka hrethiam thei lo a, an hrilhfiahna phei chuan thil a tichhe lehzual a ni," tiin a sawi chhuak a ni.