Manchester United tan 2026-27 season bul ṭan dan chu an beisei loh tawp a ni chho mek a. Red Devils hian Premier League match kua an khelh tawhah vawikhat chiah hnehna la changin, league table-ah 17-na dinhmun hial an luah mek a ni. Chu mai bakah League Cup aṭangin an tla tawh a, Champions League lamah pawh match li an khelh tawhah vawi hnih chak tawhin, vawi hnih an tlawm tawh bawk.
Season liam ta khan United hian Royal Antwerp aṭangin goalkeeper Senne Lammens chu an lalut a, Andre Onana leh Altay Bayindir te aia rintlak zawka rawn langin United goal-ah a che ṭha em em a nih kha. Mahse, tun season erawh he Belgian keeper tan hian thil a harsa chho hle thung a. Tihsual lian tham tak tak nei lo mah se, United goalkeeper ni tur chuan goal a chhuah hnem mah mah deuh a ni.
Italian chanchinbu chhuahna hmun Tuttomercatoweb chuan Lammens-a chet dan laka lungawi lohna awm thei chu remchangah lain, United hian Atalanta goalkeeper Marco Carnesecchi chu lakluh tumin an ngaihven mek niin an tarlang. Tuttomercatoweb chuan, "Marco Carnesecchi hi Manchester United ngaihven zualte zingah a tel a ni," tiin an ziak a. Sawi zawmin, "Atalanta goalkeeper Marco Carnesecchi hian Manchester United mit a la hle a. Thla eng emaw zat kalta chhunga a chet ṭhat dan enin, United hian he Nerazzurri player hi backup atan lakluh an chak hle a ni," an ti.
Tuttomercatoweb hian an tarlan zawzel danin, "Senne Lammens hi a season hmasa berah khan che ṭha hle mah se—a chet ṭhat avanga chawimawina te dawng hial khawp ni mah se—tun season-ah erawh match 13 a khelhah goal 23 ngawt a chhuah tawh a, Sabah laka an khelh ṭum chiah khan clean sheet a la nei a ni," tiin an tarlang bawk. Hei vang hian United chuan nakkum January thla transfer window inhawng turah hian he Italian goalkeeper hi lakluh dan kawng an zawng mai thei niin an sawi bawk a ni.
He inremna tihpuitlinna kawngah hian harsatna awm thei a awm ve thung a, chu chu Carnesecchi hian kumin favang (spring) lai khan Atalanta-ah kum 2030 thleng daih tur contract thar a lo ziak tawh a ni. Contract thar a lo ziah tawhna hian Red Devils-in an umzuina chu a titawp kher lo mai thei a, mahse Atalanta hian a manah to tham tak an phut ngei a rinawm. Chu bakah, Atalanta hian thlasik transfer bazar-ah an star-te an hralh zen zen lo bawk. Carnesecchi pawh hian tun season chhungin inelna hrang hrangah match 15 khel tawhin, goal 25 lai a chhuah tawh a, clean sheet vawi thum chiah a la nei bawk a ni.
He transfer thuthang hi a rinngamawm loh hle tura ngaih a ni thung a. Lammens hi a khel ṭha tawk lo a nih pawhin, Carnesecchi-a record hi a ṭha bik chuang miah lo. Sum hman tur tam nei lo United hian January thlaah tlar hnung leh tlar hma thuam chak an mamawh zawk em em a, chuvang chuan goalkeeper thar lak nan sum an thehchhuak kher lo tura ngaih a ni.
