Aston Villa goalkeeper Zion Suzuki chu Manchester United-in hun tawpa an siphurh an sut hmain an foul ngei nia puh a nihna chungchangah, United captain hlui Roy Keane chuan football chu taksa intawhsak theihna (contact sport) infiamna a nih thu mi zawng zawng a hriattir nawn leh.

November international break hma lawka Old Trafford-a inkhelah, second half stoppage time minute ruknaah Bruno Fernandes-a corner kick vawrh luh chu Patrick Dorgu chuan tauh lutin United tan point pawimawh tak a hlawhchhuahpui a. He corner pet luh a nih lai hian Japan goalkeeper Suzuki chuan ball a lo ban thelh a, Matheus Cunha leh Senne Lammens te chuan he Japan international hi an lo tibuai deuh nia ngaih a ni.

Goal an chhuah fel hnu lawk hian Villa manager Unai Emery chu a lawm loh em avangin thinur takin player luhna tunnel lam panin a lut zui nghal hmak a. Mahse, Sky Sports pundit Keane erawh chuan he goal-ah hian Villa tan vuina tur a awm loh thu a sawi ve thung.

Super Sunday-ah he Villa goalkeeper laka foul awm theih chungchang hi sawiin Keane chuan, "Suzuki hian ball lak theihna hun ṭha a insiam lo hrim hrim a ni. Ball hnuaiah tak a ding a, hnunglamah pen hnung hret a, ball va bawh zawk tur a ni a sin.

"A kawng dalin player dang an lo awm bawk a. Lammens pawhin a hnungchhawn ngei mai, mahse boruak a tam em em a, football chu taksa innek theihna a ni reng a ni. Ka tan chuan buaina tur a awm lo. Hetiang dinhmunah hian goalkeeper chuan khelmual a thunun tur a ni tih ka sawi fo tawh. Nek emaw nem emaw a nih thu a sawi a nih chuan, ngati nge khingpui player-te chu a nem let ve mai loh?"

Keane chuan sawi zawmin, "A huaisen a, khelmual a thunun tur a ni. Mahse ball a lo luh lai khan a dinhmun a nghet tawk lo a ni. Six-yard box chhung kha a ngam zawkin a thunun tur a ni a, a vela awm player-te lakah pawh tharum hmang ngam tur a ni," a ti.

Keane hian United head coach Michael Carrick-a chet dan leh inkhelh zawha a ṭawngkam pawh a ngaithei vak lo hle a. Carrick hian post-match press conference-ah Sky Sports reporter Patrick Davison nen an inhnial deuh bap bap a, Carrick hian Davison-a zawhna chhan aiin zawhna a zawt let hnem zawk mah a ni.

An inhnial dan en hnuin Keane chuan: "Manager tan hian a harsa dawn tih chu a chiang reng mai a, pressure hnuaiah a awm mek tih a hriat theih a ni.

"A ṭawng hnem viau na a, thil sawi thuk erawh a nei mang lo; hei hi a tactic a nih leh nih loh pawh ka hre lo, politician an ang khawp mai. Pressure a nei tih a chiang reng a, 'kan insiamṭhat a ngai a, thawh tur kan nei nual' tiin a sawi reng bawk. Mahse chumi kawngah chuan hma an lak vat a ngai ang.

"Hei hi kum eng emaw zat chhunga an bulṭan chhiat ber ṭum a ni a, an record hi a ṭha lo hle a ni. Goal leh chance an hlah reng bawk si. Goal an chhuah hnem dan en hian kar leh thla lo la awm turah hian eng thil nge inthlak danglam tura kan beisei ang? Eng nge training-ah an buaipui reng reng le? Hei aia ṭha zawk hian an khelh ngei a ngai a ni," tiin United hotu chu na takin a sawisel zui bawk a ni.