Manchester United leh Tottenham Hotspur te chu 1-1 in an inhnehtawk a, hei hian league match paruk aṭanga point ruk chauh hlawhchhuak thei Michael Carrick-a naute dinhmun chu a tiderthawng zual hle. The Guardian tarlan danin, hei hi kum 1986 hnuah United-in season bul an ṭan chhiat ber ṭum a ni hial a ni.

Inkhelh minute 73-naah Matheus Cunha-a pass ṭha tak aṭangin Bryan Mbeumo chuan fing takin Spurs tlarhnung a inher san a, United tan hmahruaina goal mawi tak a khung ta a ni. Mahse, he goal luh hnu minute nga lekah Tottenham player Rodrigo Bentancur chu Luke Shaw laka a chet dan avangin hnawhchhuah (red card) a tawk zui a.

Bentancur hian Shaw-a keah scissor challenge hlauhawm tak a neih hnuah an inbakkawlh zui a, Bentancur hi red card pek nghal a ni. Shaw pawh hi he midfielder a nam let ve avang hian yellow card pek a ni a, The Guardian chuan Shaw pawh hi red card hmu ve lo hlauh a nih thu a tarlang hial a ni.

Khelmualah mi 10 chauh khingpui ten an neih tawh hnu pawhin United chuan an goal neih sa chu an humhim zo ta lo a. Hun thawhbelh (added time)-ah Sandro Tonali-a ball vawrh luh chu Lisandro Martinez-a'n lo dang chat zo lovin, Solanke chuan boruakah a lo tauh per a, goalkeeper Senne Lammens-a khumin an siphurh a rawn rul ta hram a ni. Hei hi Solanke-a tan tun season-a a goal hmasaber a ni bawk.

He inkhela point khat chauh an hmuh tak avang hian United chu Premier League table-ah 12-na dinhmunah an awm mek a, tun season league-ah Ipswich lakah chauh hnehna an la chang a ni. Tottenham pawh league match paruk an khelh tawhah hnehna la chang miah lovin hnuai lam aṭanga pathumna (18-na)-ah an la awm chhunzawm zel a; an club chanchinah season ṭan tirh match paruk chhunga vawikhat mah an la chak loh hi a vawi li nan chauh a la thleng a ni.

United enkawltu Michael Carrick leh Spurs manager Roberto De Zerbi te tan hun harsa a inher chho mek zel a ni. Carrick hian a naute chu inkhel thunun tura beisei viau ṭhin mah se, Mbeumo-a goal khung hma zawng kha chuan United hian inthlunzawmna nei ṭha lovin an khel mualpho hle a ni. Mi 10 chauh khelhpui laka hmahruai zawk tawh si a hun tawp lama goal chhuah leh mai hi Fulham nena an inhnehtawk ṭuma an tempo leh intensity sawisel a lo hlawh tawh ang chiah khan Carrick-a tlarhnung venhimna chu a rinhlelhawm thar leh hle a ni.

De Zerbi chuan an rawn kir leh theih danah lawm viau mah se, an team chu inlungrual taka inkhel thei turin an la inbuatsaih fe a ngaih thu a sawi a. Manager pahnihte hian hnehna mamawh em em chungin hmabak khirh tak an nei zui dawn a ni. United hian Thawhlehni zan hian Champions League match khel turin Atletico Madrid mual an pan dawn a, Tottenham thung chuan De Zerbi-a hovin Spain ram khawpui Marbella-ah training camp an nei thung ang.