Zirtawpni khan Manchester United head coach Michael Carrick chuan Carrington media room-ah press conference a nei a, zawhna pakhat mah zawh a nih hmain minute 5 leh second 36 chhung zet sei phur tak leh rilru tak tak phawrhin thu a sawi a ni. Tun hnai match khelh chhiat chhoh avangin an team chuan "an kawng an bo" tih pawm mah se, a aia fira kir lehin dinhmun an siamṭha leh ngei dawn tih a sawi.

Carrick-a thutlukna hian United manager hlui ropui Sir Alex Ferguson-a tih ṭhin pawh min hriattir zawk a, Ferguson-a pawh khan hun pawimawhah chuan chanchinbumite zawhna zawt hmasatirtu ni lovin, amahin thu a sawi hmasa ṭhin a ni. A tirah phei chuan Carrick-a hian chhuah a tum emaw, Bournemouth nena an match khelh tur chu a match hnuhnung ber a ni dawn tih a puang mai dawn nia ngaih a ni hman a, mahse a thusawi erawh team leh player-te chawkphurtu leh auphurhna thu pawimawh tak a ni ta zawk a ni.

Carrick chuan, "Thil tlem te sawi ka duh a ni. Tun hnaiah hun ṭha kan hmang lo a, chu chu fiah tak a ni. Thla nga chhung zet chu hlawhtling tak leh ka thil hmuhah pawh ka lungawi em em a. Mahse tun hnai hian kan che chhe hle a ni. Nilaini zan kha zan chhia tak a ni a, a na kan ti tlang hle a ni. Khatianga kan khel kha a dik lova, pawm theih a ni lo. Zin chhuaka min ṭhawp tura sum leh hun seng a lo kal kan ṭantute laka khatianga kan khel kha a hrehawm ka ti takzet a ni," tiin a sawi. Como laka an tlawm hnu khan khualmual penyua kal United ṭantute hmaah kalin Carrick hian ngaihdam a lo dil tawh bawk a ni.

United dinchhuah dan leh hlutna (values) chungchang sawizuiin Carrick chuan, "He football club dinchhuahna leh a hlutna hi kum tam tak lo fiah tawh a ni a. Inngaitlawm tak leh hard-working nun hi a ni. Tlawmna leh harsatna kar aṭanga rawn ding chhuak leh ṭhin club a ni a. Manchester United hi keimah aia lian, player-te aia lian leh mi mal tumah aia lian a ni reng a, a ni zel bawk ang. Ryan Giggs, Wayne Rooney, Sir Alex Ferguson, Sir Matt Busby leh Sir Bobby Charlton-te pawh khan he club hi mi mal aia an dah chungnung zawk a ni. Thawhrah leh inngaitlawmna hi kan hloh tur a ni lova, kan hlohtir bawk lo ang," tiin a sawi zawm a ni.

He Carrick-a thusawi hi captain Bruno Fernandes-a'n Como laka an tlawm hnua Sky Italia hnena an club-in an hnunglam chanchin (past history) an ngaihsak lutuk nia a sawi hnu ni hnih lekah a thleng a ni. Fernandes chuan tun hnai kum zetah inelna lian chawi a harsa tawh tih a lo sawi a nih kha. Mahse Carrick-a thusawi hian player-te chu phun kual tawh lova, thawhrah leh inngaitlawmna hmanga team siamṭha zawk tura cho leh zirtir an ni.

Naktuka Bournemouth an hmachhawn a, an tlawm leh a nih chuan Carrick-a tan Carrington-a press conference a neih hnuhnung ber a ni maithei. Mahse he head coach hian tlawm mai a tum lova, United chu dinhmun ṭha bera dinchhuah tir leh turin theihna zawng zawng a hlan dawn tih fiah takin a lantir a ni.