Nilaini zan Champions League inkhelah Manchester United chuan Cesc Fabregas-a enkawl Como chu 4-1 ngawtin an hneh lo a, he inkhela an chet chhiat em avang hian sawisel an tawk nasa hle.
Inkhelh zawhah United captain Bruno Fernandes chuan coaching staff-te tactic hman dan chu sawiselin, "Mimal taka in-mark chunga half-press neih kan tum a ni," tiin TNT Sports hnenah a sawi a. He thil hian head coach Michael Carrick-a ngaihdan a pel hle a, Carrick chuan, "Second half-ah khan mimal takin half-press kan nei ngei a, chumi aṭang chiah chuan goal kan chhuah ta bawk a nih kha," tiin a chhang let zui a ni.
Pathiannia Premier League-ah United-in Bournemouth an hmachhawn dawn avangin, he thil hian ngaihven a hlawh chhunzawm ta hle a. United player-te hian khelmualah khingpuite nawr nan tha an seng tawk lo nge, an tlan tlem lutuk zawk tih chu chanchinbumite zawhna lian tak a ni chho mek a ni.
Como laka an inhmachhawn ṭum khan Italian club hian United aiin tlan thui zawk mahin, km 118.7 an tlan a, United erawh km 114.5 chauh an tlan a ni. Como boss Fabregas-a'n hun tawp dawn minute 10 a la awmin a player-te chu tlan hah tawh lo tura a hrilh hnuah pawh hetiang zat hi an tlan tho a, hun pek belhah Joshua Zirkzee chuan United tan goal awmchhun a khung hram a ni.
Statistics en chianin, Champions League-ah hian Youri Tielemans chuan minute 90 chhungin km 6.9 vel a tlan ṭhin a, Mason Mount leh Diogo Dalot te erawh minute 90 chhungin km 5.3 vel chauh an tlan thung. Como laka bul ṭantu an pathum hian thawhrimna lamah Como player-te an khan lo hle a ni. Fernandes-a erawh a thiante aiin a tlan thui hle thung a, Champions League match thumah km 21.4 tlan tlingin minute 90 chhungin km 8.1 a tlan ziah a, mahse United team pumpui tlan zat erawh a beitham hle a ni.
Zirtawpnia press conference neihnaah Carrick chuan pressing leh khelmuala tlan nasat chungchang hi a sawifiah a, inkhelh hneh theih nan hian pressing chauh a pawimawh ber lo tih a tarlang.
Carrick chuan, "Fimkhur a ngai hle mai. 'An tlan lo' tih kha ka sawi chhuak mai a ni a. Kan hriat angin hun eng emaw chhung chu match tam tak kan lo chak ve tawh bawk a ni.
"Tunlai hian pressing chungchang hi mitin mai hian an sawi chiam a. Pressing hi football peng pakhat te tak te chauh a ni. Pressing tia mite hrilhfiah dan pawh hi kawng hrang hrang a awm a, eng nge a nih chiah, eng vanga ti nge i nih, i chakna lai a ni em, hmun awl zawng zawng i khuh em tih te a tel vek a ni. Tunlai hian ṭawngkam lar satliah ang maia hman a ni ber mai. Inkhelh hneh tur hian i press kher a ngai lo. A chang chuan i press a, a changin i press lo thung ṭhin.
"Mite sawi lar mai mai a ni a, chuvangin fimkhur a ngai a ni. Ka sawi tawh ang khan, khelmuala tlan thui zat (running stats) hian football inkhel awmzia a hrilhfiah vek lo. Season liam taa kan thil lo tih ṭhat ṭhin tam tak kha kan tih nawn leh a ngai a ni. Tun season match ṭhenkhat leh a hun bi ṭhenkhatah chuan kan la che ṭha tho mai. Kan theihna sang bera kir leh vat kan mamawh a ni," tiin a sawi.
Pressing leh tlan satliah chu a inang lo hle a, mahse Carrick hian a player-te lakah tha thah zawk a phut a ngai dawn a ni. A bikin an hmachhawn tur Bournemouth hi AC Milan 3-0 ngawta an hneh ṭum khan nasa takin an nawr a, tha thah tak chungin an khel a ni.
