Manchester United hotute (hierarchy) chuan nipui transfer window chhung khan central defender thar an lalut lo kha thutlukna sual tak a ni tih an pawm chho hle a ni.

French defender Castello Lukeba chu Manchester United leh Barcelona ten lakluh tumin an ngaihven ngawrh hle a, he player hi RB Leipzig chhuahsan tura a inpeih tawh takzet avangin January transfer window thlen hmain chhuahna kawngka zawn a duh hle nia Sky Sport chuan a tarlang.

Red Devils te hian nipui transfer bazar liam ta khan tlar hnung thuam chak nana defender thar lakluh an lo hmaih kha tihsual lian tak (error of judgement) a ni tih an hrechhuak mek a, chuvang chuan defender rintlak lakluh thar ngei an tum ta a ni. Chutih laiin Spanish club lian Barcelona pawhin he French centre-back hi lakluh duhin an mit an len ve reng bawk.

Lukeba hi RB Leipzig tan player pawimawh ni mah se, club chhuahsan tura hma a lak mek avangin January transfer window inhawng turah hian inremna thar siam a beisei hle a ni.