Old Trafford chhuahsana free agent nih duha kum 15 mi JJ Gabriel-a'n thutlukna a siam fel hnuah, Manchester United chuan French club Lens rawlthar Mezian Mesloub chu a thlaktu atan an melh chho ṭan ta.
Kar liam ta khan The Telegraph chuan Gabriel hian club-a a inziahluhna (registration) chu tihtawp a, chhuah nghal mai a duh thu thuchhuah hmangin a thehlut tih an lo tarlang tawh a ni. Gabriel-a thutlukna hian United hotute chu a ṭhawng takzet a, Brighton nena Carabao Cup match an khelh turah pawh squad-a telh an lo tum tawh hial a nih kha. He match-ah hian lo inlan hman se chuan, kum 1956-a kum 16 leh ni 19 mi nih laia debut siamtu David Gaskell-a record khumin, United chanchina match khel thei naupang ber a ni thei dawn a ni.
Chutiang boruak a nih laiin, Gabriel hian contract a la neih miau avangin United chuan he buaina hi la chinfel theih an inbeisei tlat a. A khawi lam ve ve pawhin inremna an neih loh chuan ama thu maiin club hian an paih (de-register) ngawt thei lo a ni. Mahse, thla thara kum 16 a tlin hunah chuan, Irish passport a neih bawk avangin ram dang club-te a dawr thei tawh dawn thung a ni.
TEAMtalk tarlan danin, Gabriel hi chân mai an la inhuam loh rualin, a chhuak ta a nih pawha a thlaktu tur atan United scouting department chuan Lens rawlthar Mesloub hi an lo thlithlai lawk mek a ni. Old Trafford hotute hian kum 16 mi theihna hi sang tak niin an hria a, nakina United tana player pawimawh tak la ni thei turah an ngai a ni. Mesloub hi season liam taa Lens senior team-a a inlan ṭan aṭang khan Europe rama rawlthar sawi hlawh berte zinga mi a ni chho mek a ni.
Mesloub hian May 2026 khan Lens tan professional debut a siam a, Nantes laka bench aṭanga a rawn luh hnu second nga (5) lekah goal a khung nghal a, an team chu hnehna a chanpui nghal a ni. Tun thla tir lam khan Slavia Prague laka 3-2 a an chak ṭum pawh khan second-half substitute-in a inlan a, assist neiin Champions League-a a inlan hmasak berah theihna a phochhuak ṭha hle bawk.
Kum 2009-a piang, kumin November thlaa kum 17 tling tur Mesloub hi tun dinhmunah Lens chuan inverted right winger angin hmang mah se, No. 10 position-ah leh veilam sirah pawh chhawr theih a ni. Player thluak ṭha tak niin, tlan chak leh tlarhma chep laia inbengdai thiam tak a ni bawk. United hian ngun takin he rawlthar hi an thlithlai chhunzawm zel a, amaherawhchu Arsenal, Chelsea, Paris Saint-Germain leh Monaco te pawhin Mesloub-a chet dan hi uluk takin an lo thlithlai ve reng bawk a ni.
