Zirtawpni tlai khan Manchester United chuan behind-closed-doors friendly match-ah Lausanne Sport an hmachhawn a, he match-ah hian Matthijs de Ligt pawh a inlan nia hriat a ni.

Senior player tam zawk ram tana inkhelh vanga an awm bo avangin United hian squad naupang tak an chhawr a, club website chuan Carlos Baleba, Harry Maguire leh Matheus Cunha te an inlan thu an nemnghet a ni. De Ligt-a hming leh a thlalak erawh entir an tum hma lutuk loh nan leh fan-te beiseina tihsang lutuk loh nan tarlan a ni rih lo thung.

De Ligt hian November 30-a Crystal Palace an hnehlah hnu khan United tan competitive match a la khel miah lo a, ni 307 chhung ngawt khelmual a chhuahsan tawh a ni. A tirah manager hlui Ruben Amorim chuan match khat chauh hnungzang harsatna avanga chawlh a ngaih thu a lo sawi a, mahse season tluanin a inlan thei ta lo a, a tawpah May thla khan hliam zai dam tura thutlukna siam a ni ta a ni.

Player hun rei tak chawl tawhte lakah United hian inlan leh thut turin hun tiam strict tak an siam ngai lo a, "a ngai zat zat hun a duh ang" tih kalphung an hmang ṭhin. Kumin international break hmaa Craven Cottage-a Fulham an hmachhawn ṭum khan De Ligt hi team nen a zin chhuak ve nghe nghe a, bench-ah inlan lo mah se, he thil hian a rawn kir leh ṭep tawh tih a tilang a ni. Lausanne nena friendly match an khelh pawh hi a hliam a dam chiang em tih fiahna leh na a nei tawh lo em tih chhinna hnuhnung ber a ni.

International break zawha October 10-a Old Trafford-a Tottenham an hmachhawn hunah De Ligt hi a inlan thei ta em tih a lang dawn a, head coach Michael Carrick pawhin match hmaa press conference-ah thuchhuah a siam beisei a ni. Maguire leh Lisandro Martinez te chu tlarhnung lailia chhawr ber an ni rih a, Leny Yoro leh Ayden Heaven te pawh an awm bawk avangin Carrick hian De Ligt hi hmanhmawh takin a tir lut nghal lo ang a, zawi zawiin inkhelhna hun a pe chho zawk dawn a ni.

Hliam a tawrh hmain De Ligt hi United tana che ṭha ber berte zinga mi a ni a, November 2025 international break hmaa Tottenham lakah phei chuan goal khungin point khat a hlawh chhuahpui a, khami hun thleng khan league-a minute zawng zawng khel thei awmchhun a ni. Netherlands team-a koh a nih leh ṭum khan De Ligt chuan, "Kum 26 ka ni ta a, taksa leh rilru lamah ka career-a ka vanglai ber ka thleng ṭan tawhin ka hria. Ka rilru puthem ka thlak a, a tirah chuan tihsual neih loh ka tum ber ṭhin, tunah erawh thil ṭha tam thei ber tih ka tum tawh a ni," a lo ti tawh a ni.

Amorim-a captain-te ho zingah tel lo mah se, ṭha taka hruaitu nihna a phochhuak ṭhin. Brentford laka 3-1 a an tlawm ṭuma boruak a rit hle laia player dangte'n chanchinbumite biak an hreh lai pawhin, De Ligt hi a ding ngam a, an tihsualte pawmin mawhphurhna an lak a ngai a ni tih a lo sawi tawh a ni. He De Ligt-a mizia leh a theihna hi United leh Carrick chuan an mamawh leh hle dawn a ni.