Aston Villa nena Old Trafford-a an inhmachhawn hmain, Michael Carrick chuan international break hnuah Manchester United head coach a la ni chhunzawm dawn nge dawn lo tih hrilh a la nih loh thu a sawi a, chutih rualin an captain Bruno Fernandes chu "a ṭha ber lai ang reng a la ni" tiin a fak bawk.

Zirtawpnia inkhelh hma chanchinbumite an kawmna thu, Inrinni zana club-in an tichhuahah he thu hi a lang a ni. Kar tharah United a la enkawl chhunzawm dawn em tih tuemaw talin an nemnghetsak tawh em tih an zawhna chu chhang tawi tein Carrick chuan, "Hrilh lo ve, engkim hi pangngai takin ka kalpui tawp mai a ni," tiin chanchinbumite a hrilh a ni.

BBC Sport tarlan danin, Villa nena an inkhelh zawhah club hotute chuan manager dinhmun hi an thlir nawn (review) beisei a ni. Nottingham Forest-in Manchester City 3-1 a an hneh tak avangin, Villa lakah hnehna an chang zo lo a nih chuan United hi chawlh chhung zawng relegation zone-ah an awm dawn a ni.

Como laka 4-1 zeta an tlawm hnuah coaching staff a sawisel avangin, October thlaa mahni muala Bournemouth laka an tlawm ṭum khan Fernandes hi bench-ah dah a lo ni tawh a ni. Mahse, he Portuguese midfielder hi Chelsea lakah squad-ah a rawn kir leh a, Thawhlehnia Roma 3-2 a an lehthal ṭum khan penalty nawn chu pet lutin an thawhlehna bul a ṭan a nih kha.

Fernandes hian a ruka ngaihdam a dil em tih chanchinbumiten an zawhna chu Carrick chuan sawi chhuah a duh lo a. "Kha inbiaknaa kan thusawite chu sawi chhuak lovin keimahah ka vawng rih zawk ang e," a ti a, sawi zawmin: "Ka tan chuan Bruno-a inpekna hi rinhlelh rual a ni lo a, he team leh club tana a thil rawn thlen hi a hlu em em a, chu chu tun karah pawh a pholang leh tawh a ni," tiin a sawi.

Lisandro Martínez-a tih ang deuhva mipuite hmaa ngaihdam a dil ve loh chungchang an zawh pawhin Carrick chuan Roma laka penalty a pet dan chu a kawk thung a. "A chetdan te, a khelh dan leh penalty nawn a pet laia a rilru inbuatsaih dan khan engkim a hril chiang vekin ka hria. Bruno hi a ṭha ber lai ang reng a la ni e," a ti.

Roma laka goal hnih khungtu Matheus Cunha chu Carrick chuan chutiang theihna chu lantir nawn fo turin a duh thu a sawi bawk a. "Kha a khelh dan kha a chhunzawm zel a ngai a ni. A khel ṭha takzet a, a theihna sang ber a pholang ṭep tawh a ni," a ti bawk.

Roma laka chakna goal khungtirtu chu substitute aṭanga rawn lut Shea Lacey a ni a. December 2025-a Villa laka a debut siamtu he academy winger hi international break chhung hian England Under-20 squad-ah koh nawn a ni bawk.

Inrintawkna chungchang sawiin Carrick chuan, "Thil i ngaihtuah buai lutuk lova, i theihna ring chunga i rilrua awm anga i khelh hian i ṭha ber ṭhin. Kha zan khan chutiang chuan kan ti nasa hle niin ka hria," a ti.

Tun season-ah United hian a zawnin match hnih an la chak ngai lo a, Carrick chuan hei hi inkhelh chhunga an thutlukna siam leh rilru pek tawk loh vang a nih thu sawiin: "Thil lawmawm tak erawh chu hei hi kan la siamṭha thei a ni," a ti bawk.

Squad tam zawk ram tana an chhuah dawn avangin, Carrington-ah senior player pathum emaw pali vel chauh an awm dawn thu Carrick chuan a sawi a, kar tharah training neiin kar tawpah chawlh an nei maithei tih a sawi bawk. Thomas Tuchel-a'n England squad thar a puanah United player pakhat mah an tel lo a ni.