June thlaa AC Milan head coach atana ruat Ruben Amorim chuan San Siro-ah hun harsa a hmachhawn ṭan ta der mai. Manchester United aṭanga ban a nih hnu lawka kum hnih daih contract ziaktu he Portuguese coach hian, Old Trafford chauh lo pawh Milan khawpuiah pawh nghawng na tak a awm thei tih a hrethiam chho mek a ni.
Amorim-a hnuaiah Milan hian bul an ṭan ṭha hle a, Torino leh Venezia te chu goal hnih ve ve khungin an hneh a. Mahse, hemi hnu hian che ṭha zui thei lovin, Europa League opening match-ah Amorim-a club hlui Benfica lakah 2-0 ngawta an tlawm tak avangin a zawnin match thum chhung hnehna an chang ta lo a ni. Hei hian sawiselna nasa tak a chhuah tir a, club chhungrilah pawh harsatna sutkian dan zawngin meeting an neih phah hial niin tarlan a ni.
Italian chanchinbu miten Amorim an sawisel dan hi England-a a awm laia a tawn tawh nen a inang hle. Elland Road-a Leeds United nen an inhnehtawk ṭuma a player-te mipui hmaa a sawisel hrep avanga thla 14 chhung United a enkawl hnuah ban a tawk a nih kha. Gazzetta chanchinbu mi Marco Pasotto chuan Amorim-a'n United a enkawl laia a chet dan nen a inanna a tarlang a, Milan a enkawl aṭanga thla hnih chauh a la liam chungin boruak chu "hrehawm tak" a nih chhoh tawh thu a ziak a ni.
Pasotto chuan, "Tunah chuan hetiang dinhmun hi kan thleng leh ta der mai a, Manchester-a a thil tawn (vawikhat phei chu 'Pope ngei pawhin min ngen mah se ka tactics ka thlak dawn lo' a tih ṭum ang kha) kha kan tawng nawn leh mek niin a lang a. Thil thleng aṭanga kar tlemte chauh a la liam laia coach thar berin 'hlawhchham' tih ṭawngkam awlsam taka a hmang nghal mai hi a mak hle a ni," tiin a sawi.
Chanchinbu hrang hrangin an tarlan danin, Milan neitu Gerry Cardinale chuan buaina awm mek chinfel dan tur sawipui turin Amorim hi biak a tum a ni. Mahse he United manager hlui hian a khelh dan phung (system) hi a player neih azira thlak mai a tum hmel loh hle thung. Tuttosport leh Corriere dello Sport chanchinbute chuan Benfica laka a chet danah Amorim hi 10 aṭanga 4.5 chauh an pe a ni.
Corriere dello Sport chuan Amorim-a lineup duan dan chu sawiselin, "Fimkhur rawh Ruben, kawng a tawlhthlu tawh a, first-half leh inkhelh tawpa fan-te au elna khan an dawhtheihna a tawp ṭep tawh tih a lantir a ni. Engtin nge Rabiot, Modric, Moreira, Pulisic leh Gila te rualin i hawnsan theih?" tiin an zawt hial a. Calciomercato pawhin 10 aṭanga 5 pein, Portuguese coach hian thil a tichhe hle niin an sawi bawk.
Boruak a rit chhoh mek lai hian, Nilaini zana Benfica laka an tlawm ṭum khan San Siro mualah Antonio Conte chu inkhel en tura a lo ṭhu ve reng chu Italian media-te mit a la hle a. Calciomercato chuan Conte-a inlan chu sawiin, Amorim chu beidawnna tualzawlah a cheng mek a ni tih an tarlang a, Milan ṭantute rilruah Conte-a hming a riak lian hle tawh tih an sawi zui a ni.
Italy rama Serie A title vawi nga lo la tawh Conte hi Milan lam hian Amorim-a thlaktu atan an duh niin sawi a awm a. Marco Barzaghi pawhin Milan fan-te chuan Amorim-a aiah Conte hi an duh zawk hle tih a sawi chhuak ve bawk a ni.
