Premier League match khelh hmabak a neih leh hma in Manchester United chuan insiamṭhat leh nghal an tum mek. Manager Michael Carrick chuan Pathiannia Fulham an hmachhawn hunah a player-te hnen aṭangin chet chhuahna rang tak hmuh a duh a, United hi Carabao Cup aṭanga Brighton-in an hnawhchhuah tak avangin an la hnual hle a ni.
Brighton nena an inkhelh ṭum khan United chuan minute 10 chhungin 2-0 in hma an hruai hman a, awlsam taka chak tur anga lang mah se, Brighton chuan danglam taka rawn chhang letin 3-2 in Old Trafford-ah hnehna an chang ta zawk a. Hei hian manager Carrick-a chungah pressure a thlen ta hle a ni.
He cup match-ah hian academy player langsar kum 15 mi JJ Gabriel chu a inlan lo a, club-a a registration tihtawpsak tura a ngen hnuah squad-ah hian a tel lo a ni. Red Devils academy-a rawlthar theihna ngah tak Gabriel hian first team panna kawng eng tak a nei nia ngaih a ni a, club legend Roy Keane pawhin he naupang thutlukna chungchangah hian a ngaihdan a sawi chhuak ve bawk.
Hemi rual hian Ipswich Town manager hlui Kieran McKenna, a hmaa United coaching staff-a lo inhmang tawh pawh, Old Trafford-a Carabao Cup match khelh a nih ṭum khan VIP box (directors' box) aṭangin inkhel thlir turin a rawn inlan bawk a ni.
United manager atana lo ngaihven tawh McKenna-a rawn inlan:
Kum 40 mi McKenna hi June thla aṭang khan club enkawl lovin a la awm a, kum 2021 December thlaa Ipswich a zawm hmain United-ah Carrick-a nen coaching staff-ah an lo thawk dun tawh a ni. Ipswich a enkawl chhungin he Northern Irish coach hian Tractor Boys hi Premier League-ah vawi hnih ngawt a kaisanpui a, kumin nipui khan chhuahsan a thlang ta a ni. Kum hnih liam ta khan Erik ten Hag-a contract pawhsei a nih hmain United hian McKenna hi manager atan an lo ngaihven tawh a ni. Ipswich a chhuahsan hnu khan McKenna chuan, "Ka coaching career-a ka thlawp tlat ṭhintu ka chhungte nen hun hman dun nan leh management aṭanga chawlh hahdam rih nan ka hmang rih dawn a ni," a lo ti tawh a ni.
Gabriel-a chungchanga Roy Keane-a ngaihdan:
United legend Roy Keane chuan pre-season tour-a first team tana inlan tawh Gabriel chu first team-a inlan theihna hun ṭha a hmuh hma chu dawhthei taka nghak turin a chah. Tun season-ah matchday squad-ah he rawlthar hi a la tel lo va, Keane chuan Carrick-a team-ah hian he naupang hi nawr luh vut vut chi a nih rih loh thu a sawi.
Stick to Football podcast-ah Keane chuan, "A nghak thei lo ang maw? Kum 15 mi chauh i la ni a, Man United first team-a khelh chungchang i sawi a nih chuan nghak hrih rawh. Cup match dang a awm leh thlengin chawlhkar ruk vel chu a nghak thei miah lo em ni? Carrick-a lakah pressure a sang tawh hle a. Sir Alex Ferguson khan rawlthar te chu first team-ah a tir lut zawk ṭhin na a, tun dinhmunah United hian chak hi an mamawh takzet a ni. Cup match-ah hian naupang pakhat emaw pahnih emaw chhawrhin kan peih zawh pui mai mai thei lo. Season chhunga kan tlukchhiat loh nan point leh chakna kan mamawh a ni. Kum 15 mi lekin chhan lovah lungawilohna a lantir a nih chuan, kan buaipui mai tur a ni," tiin thutak takin a sawi.
