Nipui transfer window-a £155million zeta an squad thuamchak nana sum an hman hnuah, Manchester United manager Michael Carrick chuan season chhunga match 14 an khelhnaah a vawikhat nan an midfield inkawp ṭha ber tura a ngaih Kobbie Mainoo leh Carlos Baleba te chu a entir thei ta chauh a. Mahse, he inkawp thar hi second half ṭan tirh teah vanduaithlak takin a ṭhulh leh a ngai ta a ni.
Roma nena an inkhelh ṭum hian kumin nipuia £70m-a Brighton aṭanga an lakluh Baleba leh academy chhuak Mainoo te hi bul an ṭantir dun a. Kumin nipuia Baleba, Chelsea aṭanga Andrey Santos (£50m) leh Aston Villa aṭanga Youri Tielemans (£35m) te an lakluh hnuah, Mainoo leh Baleba te inkawp hi Carrick-a'n tlar lailia duhtlanna ṭha ber atana a ngaih a ni.
Mahse second half ṭan tirh minute khat pawh a la tlin hmain, Baleba chuan a chakna leh a theihna hmanga Roma defence a nawr tlang hnu chiahin a hamstring a hliam ta hlauh mai. Hemi avang hian kum 22 mi Cameroon midfielder tan hian damdawi in bawk pan leh a ngai dawn ta a ni.
Baleba hian United a zawm hnuah vanduaina a tawk chho zatin, pre-season-a a kerek a tihhliam avangin October 10 hma khan team tan a inlan thei lo a. Tottenham nen an inkhelh ṭumin Mainoo nen hian minute 31 chhung mualah an inlang dun tawh a, mahse hemi hnu hian Mainoo pawhin hliam tenau a neih avangin match pali ngawt a hmaih zui a nih kha. Carrick-a'n Baleba-a hliam hi a serious mai ang tih a huphurh hle a ni.
Roma laka Baleba-a hmunruak luah tur hian kum 29 mi Youri Tielemans a rawn inlan a, he Belgian midfielder hi a che ṭha hle a, United attack thlawp zui chhotuin ball thunun kawngah a ṭangkai hle. Old Trafford-a a bulṭan dan la fuh chiah lo mah se, he match-ah hian a theihna tak tak a rawn phochhuak a ni.
Head coach Michael Carrick chuan Tielemans-a chet dan fak zuiin: "Youri-a'n game a rawn zawm dan khan a nihna tak a tilang hle a, team chhehvel boruak leh kan tluang loh chhoh dan enin Old Trafford-ah hian bul ṭan dan duhawm ber a nei lo a ni maithei. Mahse a nungchang, a mizia leh team a rawn puih dan khan a theihna sang tak a tilang a ni. Ani chu mihring chhuanawm tak a ni a, team-a a thil rawn thlen zawng zawng avang hian ka kianga a awm hi ka hlimpui hle a ni. Youri-a chet dan leh game-a a rawn inlin danah hian ka lungawi takzet," tiin a sawi.
Season bul ṭan tir lam khan Mainoo leh Tielemans te hi match riat zinga match parukah bul an lo ṭan dun tawh a. Aston Villa aṭanga an lakluh Tielemans hi Carrick-a'n mual lailia inkhel thunun thei tur atana a lakluh a ni. Chelsea aṭanga an lakluh Andrey Santos pawhin hun ṭha a hmu nual tawh a, mahse thla sei zawk atan a rintlak ber em tih erawh zawhna a la awm thung.
Bruno Fernandes pawh No. 10 role-ah a kir leh tak avangin, kar tawp hian Tielemans-a club hlui Aston Villa an mikhual hunah Mainoo leh Tielemans te hi mual lailiah an inkawp zui leh rih a ngai dawn nia tarlan a ni.
