Manchester United captain Bruno Fernandes chuan tun season-a an club ṭan ṭha lo tak mai chhan chu 'dressing room pawn lam thil hrang hrang' vang a nih thu a sawichhuak. Inelna hrang hrangah match a zawnin vawi pakua (9) ngawt hnehna nei lova an awm hnuah, Thawhleh zan khan Champions League league phase match-ah Old Trafford-ah Roma 3-2 in an hneh ta hram a ni.
He match-ah hian Fernandes chuan penalty aṭangin goal hmaih lova khungin United tan hma a hruaipui a, Matheus Cunha-a'n goal hnih thunin manager Michael Carrick-a naute hian inelna pui beiseina nung zui zel nan hnehna pawimawh tak an sual chhuak ta a ni. Heti a nih rual hian Premier League lamah erawh United hi an che chhe hle a, international break thlen hmaa match pakhat chiah khelh hmabak an neih mekah table-ah 17-na dinhmunah an la awm thla duai mek a ni.
TNT Sport Brazil hnena inenkawlna a neihnaah Fernandes chuan thil awm dan sawifiahin: "Hei hi inrintawkna chungchang a ni a. He club-ah hian result a ṭhat loh chuan thil a harsa ṭhin hle. Dressing room pawn lamah, player-te leh backroom staff-te thunun phak bak thil tam tak a awm a, chung chuan club chet ṭhatna leh khelmuala kan thil tih theih turte chu a ti harsa zo ṭhin a ni," tiin a sawi.
Fernandes chuan sawi chhunzawmin: "Heng thilte hian player tam tak a khawih pawi a. Ṭhenkhat chuan an tawrh thiam mai laiin, ṭhenkhat erawh chuan an tuar nep zawk thung. Keimahni ṭheuhah beiseina sang tak kan in-set a, thil a kal tluan tak loh chinah chuan club tana kan theihna tak tak kan phochhuak thei lo chu rilru beidawng takin min siam ṭhin a ni.
"Dinhmun hi hetianga a awm tawh chuan buaina hi pakhat chauh a ni ngai lo. Pakhat aia tam a awm ṭhin. Siamṭhat tur leh tih dan dang hmanga tih tur tam tak a awm a ni. Vanduaithlak takin, thil a kal sualna hi a rei tawh hle a, chu chuan thil a tiharsa lehzual a ni. He club-a awm tute pawhin chak loh hi an duh bik lo tih kan hria. He club tana inremna i ziah a, a aiawh i nih tawh chuan thil sang zawk thleng phak i duh vang a ni. Mahse, vanduaithlak takin tun hnai kum tlemte chhung khan chutiang chu a thleng thei rih lo a ni," a ti bawk.
United hian international break thlen hmaa Premier League match hnuhnung ber atan kar tawp hian Old Trafford-ah Aston Villa an mikhual chhunzawm leh nghal dawn a ni.
Hemi hma Thawhleh zana Amazon Prime nena an inbiaknaah, Fernandes chuan manager Carrick-a tactics a sawisel avanga kar tlemte liam taa squad aṭanga dropped a nih a, hemi hnua starting line-up-a a kir leh hnuah Carrick hi a thlawp zui tlat thu a sawi bawk. Media-a manager nen an inkar chiang lo leh inbiakna hranpa an nei nia sawite chu dawt a nih thu sawiin, "Club hian chak hi a mamawh takzet a, player-te pawhin he hnehna [Roma laka chak] hi an mamawh em em a ni. Hemi dinhmun aṭanga chhuah ho nan hian theih tawp kan chhuah dun mek a ni," a ti.
Fernandes chuan, "Manager-in Chelsea laka bench-a min dah kha chu ka khelh ṭhat loh vang a ni a, a dik reng a ni. Ka ṭawngkam hman avanga hremna anga ngai an awm a nih pawhin a dikna chen a awm hle. Manager hi thutlukna siamtu a ni a, ka pawm a, hma lam ka panpui a ngai a ni. Hemi hian manager, staff leh player dangte laka rinna ka neih hi a thlak danglam chuang lova, hma huna match tin chak ka duhna pawh a thlak chuang lo," tiin a sawi zui a ni.
