Manchester United co-owner Sir Jim Ratcliffe chuan Champions League-ah Roma lakah hnehna ropui chang let mah se, fan-te lakah sawiselna a tawk chho mek. Michael Carrick-a naute hian Thawhlehni zan khan a zawnin match kua chhung hnehna an chan loh chu an titawp a, kar tawpa Aston Villa an hmachhawn hunah pawh he boruak ṭha hi chhawmnun an beisei ang.
Tun season-a an chet chhiat chhoh avangin United boss Carrick-a pawhin pressure lian tak a hmachhawn mek bawk. Italian club Roma an hmachhawn ṭum khan 2-0 ngawta an hnufual hnuah, Bruno Fernandes-a penalty leh Matheus Cunha-a goal hnih hmangin United hian point thum hlu tak an la let hram a ni. Chuti chung chuan Old Trafford-a pungkhawm fan-te chu an la lungawi chuang lova, inkhelh laiin club neitute lakah lungawilohna an lantir a, INEOS hotupa Ratcliffe leh Glazer chhungkua te chu fan-te au elna tawktu ber an ni.
December 2023-a United-a zaa 25 (25%) share a lei aṭang khan kum 74 mi Ratcliffe hian fan-te lakah sawiselna a tawk chho tawh a ni. A pawl INEOS hian Old Trafford-a football enkawlna zawng zawng an kuta an dah vek laiin, Ratcliffe hian Glazer chhungkua anga fan-te huat a hlawh chho a nih chuan a ban mai tur thu a lo sawi tawh ṭhin a, chu dinhmun chu Thawhlehnia Roma an hmachhawn ṭum khan a lang chhuak hial a ni.
Nikum khan The Times hnenah Ratcliffe chuan a ngaihdan lo sawiin, "Reilote chhung chu ka tuar thei ang. Mi huat hlawh hi pawi ka ti lo, a chhan chu Manchester United hetiang dinhmuna an ding hi tumahin hmuh an duh lo a, tun huna kan thutlukna siam mekte pawh hi tumahin an lawm lo tih ka hria a ni," tiin a sawi. "Thinrimna tlem azawng chu ka tuar thei a, mahse mi pangngai ve mai ka ni. A bik takin ṭhiante leh chhungte tan chuan a nuam miah lo. Chuvangin, Glazer chhungkuain an tawrh ang em ema hauhna leh huatna a thlen chhoh tak tak chuan, 'A tawk e, midangin he hna hi thawk rawh se' tih ka sawi a ngai ang," a ti.
Ratcliffe chuan sawi zelin, "Glazer-ho hi inkhel en tur pawhin an rawn kal ngam tawh lo a. Tunah chuan hliahkhuh hmunah an tawm bo ta a, keimah chauhvin sawiselna zawng zawng ka dawng ta a ni. Club kan lei aṭang khan an hmel ka la hmu leh lo a, 'Jim, kan lawm e, hna ṭha tak i thawk e' tih ang lek an ni. Tun dinhmunah chuan vengtu (security) ka nei lo a, chutiang kual vel chuan ka khawsa lo. Mahse hetiang boruak hi kan thlen chhoh tak tak chuan thil a nuam tawh lo ang," tiin a lo sawi tawh a ni.
Hetiang boruak a kal chhoh mek lai hian, Premier League striker hlui Djibril Cisse chuan, INEOS-in an share hi hralh an duh a nih chuan United legend David Beckham chu Ratcliffe-a thlaktu atan a ṭha ber dawn tih a rawt a ni. Kum 51 mi Beckham hi MLS club Inter Miami co-owner a nih tawh avangin club enkawl kawngah tawn hriat a nei ṭha hle.
Liverpool striker hlui Cisse chuan Mr Gamble hnenah sawiin, "David Beckham hian Manchester United-ah Glazers leh INEOS te hi a thlak thei em? Engvangin nge a theih loh vang? Inter Miami-ah pawh hna ṭha tak a thawk mek alawm," a ti. "Amahah boruak a nei a, hming a nei a, ani chu David Beckham a ni a, khawvel football-ah nghawng lian tak a nei a ni. Chuvangin engvangin nge a theih loh tehlul ang?" tiin a sawi.
Beckham-a'n Old Trafford-ah club neitu nihna a la a nih chuan, Sunderland-a a manager hlui Roy Keane chu United boss thar atan ruat nghal tura a duh thu Cisse chuan a sawi bawk. Cisse chuan, "Club legend dang lo kir lehna a ni dawn a. Amah leh Roy Keane an nih ngat chuan a ropui ngawt ang. Keane hian tawnhriat leh chanchin nghet tak a nei a. Mize paukhauh tak nei a nih bakah club tana mi pawimawh tak a ni bawk," tiin a sawi belh a ni.
