Amazon Prime-in 'All or Nothing' documentary an lak mek laiin, Manchester United head coach Michael Carrick-a hmakhua atan Pathiannia Aston Villa nena an inkhelh tur hi a pawimawh tawpsah a ni dawn ta. Carrington-a club hotute nena emergency meeting an neih hnuah, Chelsea, Roma leh Aston Villa nena an match pathum inhmachhawn tur hian Carrick-a hmabak a hril dawn tih zawng zawngin an hre lawk sa vek a ni.
Chelsea laka second half-a an tlahniam ta vak leh Lisandro Martinez-a minute hnih chhunga red card a hmuh avanga an tlawm hnuah, Champions League-a Roma laka first half an khelh dan pawh khan Carrick-a hna a titawp teuh hle a nih kha. Mahse, second half-a thapui chhuaha 3-2 a an let leh hnuah, point thum hlu tak an hmuh bakah head coach Carrick-a'n a hna a hum rih hram a ni.
Tunah chuan mipuite mit chu Pathianni inkhel turah hian a fuk ta vek a, hei hi Carrick-a manager career-a inkhel pawimawh ber pawh a ni maithei a ni. Team selection hi United boss tan chuan a pawimawh ber dawn a, MEN Sport lamin a tarlan danin player fit lo an awm a nih pawhin, Carrick-a'n bul a ṭantir ngei ngei ngai player mi panga (5) an awm a ni:
1. Senne Lammens: Season liam ta angin che ṭha pur pur rih lo mah se, team pum chet chhiat meklai hian Belgian goalkeeper Senne Lammens hi United tana sulsutu pawimawh ber a ni fan a ni. Roma laka goal pahnih an chhuahah khan a tihsual a awm lo va, half-time hmaa Donyell Malen-a shot hlauhawm tak a lo dandsak khan team thawhlehna tur kawng a sial hle a ni. Karl Darlow leh Tom Heaton te aiin a rintlak zawk daih avangin Villa lakah bul a ṭan ngei a ngai a ni.
2. Leny Yoro: Roma laka United tlarhnung (defence) an phili hle laiin, Leny Yoro erawh a langsar zual hle. Right-back-ah khel mah se, tihsual nei lovin chak tak leh fing takin a khel a, Roma goal khung tur chiang bal pawh a lo dang hman a ni. Pathianniah hian Lisandro Martinez-a hnawhchhuah a nih vangin hrem a ni dawn a, Ayden Heaven pawh rest pek a ngaih hmel avangin, Yoro hi central defence-ah sawn chhohin Harry Maguire emaw Matthijs de Ligt nen chhawrdun a ṭul ang. Patrick Dorgu a fit a nih chuan Diogo Dalot pawh right-back-ah kir lehin Yoro nen defence ban an kuk thei ang.
3. Kobbie Mainoo: Khelmual a rah tawh kher hi chuan Kobbie Mainoo hi United midfielder ṭha ber a ni tih a chiang ṭhin. Roma lakah pawh puitling takin midfield a rawn thunun a, hliam avanga a lo chawlh chhunga United-in an mamawh zia a phokhuap chiang hle a ni. Carlos Baleba-a hliam a lian tham zawk dawn nia a lan avangin, Mainoo hi tlar laili-ah a inlan chhunzawm reng a ngai dawn a ni.
4. Shea Lacey: Roma laka Amad Diallo-a chet chhiat hnuah substitute aṭanga rawlthar Shea Lacey a rawn luh khan Old Trafford stadium boruak a tiur hliah hliah a ni. Mual sir aṭanga tlan tlang ngam tak niin, Matheus Cunha-a goal khung tur pawh mawi takin a siamsak (assist) nghe nghe. Carrick-a hna a zawn meklai hian rawlthar theihna ngah tak Lacey hi bul ṭantir ngei a ngai a ni.
5. Matheus Cunha: Season chhungin tlarhma lailia chhawr a nih ṭhin avangin Cunha hian sawisel a tawk hnem hle a. Mahse second half-a Bryan Mbeumo nen an position an inthleng takah chuan, Brazilian forward hian goal pahnih ngawt khungin victory a thlen ta a ni. United-in ball an thunun theih nana Cunha-a thawhhlawkna hi Villa lakah pawh phawrh chhuah nawn a ngai dawn a ni.
Heng player panga-te hian Roma laka an chet ṭhatna hmang hian Pathiannia Aston Villa nena an inkhelah Carrick-a hna an chhanhim zui zel thei ang em tih chu entu zawng zawng tana zawhna lian ber a ni dawn a ni.
