Manchester United legend Wayne Rooney-a fapa Kai Rooney chuan Under-21 tana a debut match-ah beisei loh zawk tawng mah se, a tuk lawkah a theihna rawn pholang lehin social media lamah a rilru a phawrhchhuak.

Kum 16 mi forward hian United youth team-ah hma a sawn chho hle a, Zirtawpni khan U21 squad-ah koh chhoh niin Premier League 2-ah Loughborough University muala Nottingham Forest an hmachhawn ṭumin bench-ah a ṭhu a ni. Minute 78-naah 2-2 a an inhnehtawk laiin khelmualah rawn lutin a debut a siam a, team tan chakna goal thunpui tumin beiseina nei mah se, hun tawp dawn lamah Forest-in goal khung hlauhin 3-2 in an tlawm ta zawk a ni. Hei hi United U21 lamin Ipswich Town, Leicester City leh Brentford an hneh hnuah tun season-a an tlawm vawikhatna a ni.

Mahse he hnehpawh lohna hian rawlthar rilru a tihnual hman lo. Inrinni khan Rooney hi club U18 starting XI-ah a inlan nghal a, Nottingham Forest bawk an hmachhawn lehnaah first half-ah goal mawi tak khungin United chu hma a hruaipui ta hlauh a ni. Minute 66-naah lakchhuah niin, Forest lamin minute 78-naah an siphurh an rawn rul a, match hi 1-1 in an inhnehtawk zui ta a ni.

Match hnih a zawn deuhthawa a khelh hnu hian Rooney chuan social media lamah a goal khung lawm lai thlalak tarlangin, "back on the scoresheet" (goal khungtu zinga tel leh ta) tiin thu tawi a ziak zui a ni.

Kar hnih liam ta chhung khan Rooney hian hun buai tak a hmang chho a, kar liam ta mai pawh khan UEFA Youth League-ah Atletico Madrid laka 3-0 a an tlawm ṭum khan second half-ah lutin United U19 tan a debut a lo siam tawh bawk. July thla khan United nen kum hnih chhung daih tur scholarship contract a ziak a, he inremna hi nakinah kum thum daih professional contract-ah chantir theih a ni ang a, kum khatah £50,000 bakah kum tin ziah luh man (signing-on fee) dawn theihna a nei dawn a ni.

Football khawvela ama hming chher tuma a beih tan tirh lai hian, a nu Coleen chuan 2024-a 'I’m a Celebrity…Get Me Out of Here' show-ah Kai hian a pa Wayne chu a inkhel en lo turin a khap tawh ṭhin tih a lo sawi chhuak tawh a ni. Coleen chuan, "Kai hian grassroots tournament vel a khelh lai khan a pa chu lo kal lo turin a hrilh ṭhin a, a chhan chu mipuite'n an bawr buai nasat lutuk avangin inkhel pawh a thlir hleithei lo ṭhin a ni. Naupangho bulah chuan, 'Kalsawn rawh u, ka fapa inkhel ka en duh,' tiin i sawi ngawt thei bawk si lo. Kai chuan, 'Pa, lo kal a sawt lo, ka inkhel pawh i en thei chuang lo,' tiin a hrilh tawp mai a ni," tiin a lo sawi tawh a nih kha.

Mahse tun hnaiah erawh Wayne Rooney hi a fapa inkhel en tura a lan leh tawh avangin he inkhapna hi chu a tawp tawh niin a lang a ni.