2026-27 season bul an ṭan dan a ṭhat tawk loh avangin Old Trafford boruak chu a zawi hle a. Manchester United-in an match hmasa paruk khelh tawhah vawi hnih chiah hnehna an la chan avangin head coach Michael Carrick chu sawiselna lian tak hnuaiah a awm mek a ni.

Fulham head coach Alvaro Arbeloa chuan a chunga pressure awm chu United head coach chunga awm nen khaikhin tum viau mah se, Premier League club lian bera mawhphurhna phurh chu a inang lo hle. Sawiselna hian Carrick chauh a kawk lova, beisei anga khel chhuak zo lo player ṭhenkhat pawhin thil thleng mek avang hian dem an hlawh ve bawk a ni.

Mi tam tak ngaihdan chuan tun season hi French defender naupang Leny Yoro tan chuan Old Trafford-a sum tam tak senga lakluh a nih chhan pholanna tura hun pawimawh tak a ni. Hei hi Arsenal aṭanga £1.5m chauhva an lakluh English centre-back Ayden Heaven-a tan pawh a dik ve tho bawk ang.

Nilaini zan khan Carabao Cup-ah United chu Brighton lakah 3-2 in an tlawm a, chu match-ah chuan centre-back-ah Yoro leh Heaven te hi an inkawp a nih kha. Zirtawpni chawhnu lama press conference-ah chanchinbumite chuan Yoro-a khelh dan leh tun season hi club-a a theihna fiah nana a hun hnuhnung a nih leh nih loh chungchang Carrick hi an zawt a. Carrick erawh chuan hetiang ngaihdan hi a hnawl fithla ṭhak a, kum 20 mi French defender hian club-ah hmakhua eng tak a nei tih a nemnghet thung a ni.

"A teuh lo mai, Leny hi kum 20 chauh a la ni tih kan hriat a ngai a ni," tiin Carrick chuan chanchinbumite a hrilh a. "A dinhmun thlirin, a hmaah hian hmabak ropui tak a awm a, theihna sang tak a nei bawk; thil a la zir chho mek a, a la ṭhang lian mek a ni. Hetiang club lianah hian hetiang rual leka centre-back nih chu hna khirh tak a ni. Ani hian a hlen thei ngei ang a, Ayden pawhin a hlen thei bawk ang; mahse player puitlin hun chiah hi a inang vek lo a ni.

"Player ṭhenkhat chu kum 18 an nihin hetiang dinhmun sangah hian an che ṭha nghal em em thei a. Leny pawh hian a thei a ni tih a lo lantir tawh a. Leny chungchangah hian rilru hahna ka nei miah lo. Thil ṭha tak tak a ti hnem hle a, thil zir chhoh zelna pual a ni mai. A chang chuan kum 20 a nihin a ni thei a, a chang chuan kum 22, 23, 24 vela rawn inphawrh chhuak ṭan te pawh an awm bawk. Chuvangin hun tiam chiah a awm lo. Hmasawn zel leh kawng dik zawh chhunzawm a, zir zel duhna nei a, hun ṭha tam zawk neih chhoh zel a pawimawh a ni. Thil ṭha tak tak a ti a, fimkhur erawh kan ngai a; game khat emaw, half khat emaw, match chhunga hun reilote thil thleng vang mai maiin player chungchangah hmanhmawh taka thutlukna (knee-jerk decisions) ka siam ngai lo ang. Leny-ah hian rinna nghet tak kan nei a ni," tiin a sawi.

Carrick-a backroom coaching staff-a tel Jonny Evans leh Jonathan Woodgate te aṭanga thil zir theihna a neih chungchang zawhna pawh chhangin, Carrick chuan heti hian a sawi zawm a:

"Ni e, tawnhriat an ngah hle a ni. Leny hi a vannei hle a, he position hi lo khel tawh a, hrethiam em em tu coach ṭha tak tak a nei a ni. Leny hian hmabak lian tak a nei a, thil a zir mek a, khelmual chhung laihnah ngei pawh thil a zir chho mek a ni. A chang chuan a khirh ṭhin a, a chang erawh chuan a khel ṭha em em bawk. Chuvangin a ṭhang zel ang a, thil a zir belh zel bawk ang. Dinhmun ṭha takah a awm a, hmakhua eng tak a nei a ni," a ti bawk.

Yoro hian tun season chhungin United tan match 4-ah minute 202 chhung hun a hmang tawh a, tun kar chhung khan France U20 national team squad-ah koh a ni bawk. Tun season-ah hian United starting lineup-ah hmun nghet chang chho a, a theihna pholang zui zel turin a inbeisei hle a ni.